ABŞ ictimaiyyəti İran hücumlarına qarşı çıxır
ABŞ-nin “The Washington Post” qəzetinin keçirdiyi sorğuya əsasən, amerikalıların 45 faizi ölkələrinin İrana hücumunu dəstəkləmir. Sorğuda iştirak edənlərin böyük hissəsi İran hökumətinin hərbi güclə devrilməsinə və ABŞ əsgərlərinin bu ölkəyə göndərilməsinə qarşı çıxıb.
İsrailin iyunun 13-də İrana hücum etməsindən sonra başlayan müharibədə 12 gün sonra atəşkəs əldə olunub. ABŞ Prezidenti Donald Trampın əmrilə İranda üç nüvə obyektinə hücum təşkil olunması və İranın cavab zərbələri ABŞ daxilində geniş ictimai müzakirələrə səbəb olub.
Crossmedia.az ABŞ mətbuatına istinadən xəbər verir ki, “The Washington Post”un min nəfərdən çox iştirakçı ilə keçirdiyi sorğuda Trampın İrandakı nüvə obyektlərinə hava hücumu əmrini dəstəkləyənlərin faizi 38, əleyhinə olanların faizi isə 45 olub. 17 faiz isə bu mövzuda fikrini bildirməyib.
Sorğu nəticələrinə görə, Trampın Respublikaçılar Partiyasını dəstəkləyən seçicilər arasında hücuma dəstək artsa da, Demokratlar və müstəqil seçicilər arasında əksinə, hücumlara qarşı çıxanların faizi yüksək olub.
ABŞ-lilər arasında İran hökumətinin hərbi yolla devrilməsinə dəstək 22 faiz olaraq qalarkən, 48 faiz bu fikrə qarşı çıxıb. Eyni zamanda respondentlərin 53 faizi ABŞ əsgərlərinin İran ərazisinə yeridilməsinə qarşı çıxıb.
Respondentlərin 74 faizi isə ABŞ ilə İran arasında genişmiqyaslı müharibənin başlanmasından narahat olduğunu bildirib. Sorğu həmçinin ABŞ-də partiyalararası dərin fikir ayrılıqlarını da üzə çıxarıb.
Mədinə Cəlilova
22:50 25.06.2025
Oxunuş sayı: 10107
