İngiltərə Rus əmlakının gəliri ilə Ukraynaya 350 raket göndərəcək
İngiltərə, müsadirə etdiyi Rusiya əmlakından əldə etdiyi faiz gəliri hesabına Ukraynaya 70 milyon funt sterlin (təxminən 3,8 milyard manat) dəyərində 350 hava hücumundan müdafiə raketi göndərəcəyini açıqlayıb.
Crossmedia.az xəbər verir ki, İngiltərə Müdafiə Nazirliyinin məlumatına görə, Ukraynanın hava hücumundan müdafiə imkanlarını gücləndirmək üçün bu ölkəyə təkmilləşdirilmiş qısa mənzilli havadan-havaya raketlər (ASRAAM) veriləcək. Əvvəlcə döyüş təyyarələri üçün hazırlanmış bu raketlərin yerüstü atış sistemi üçün uyğunlaşdırılması üç ay ərzində tamamlanıb. Raketlər hərbi yük maşınlarının arxasına yerləşdirilmiş batareyalardan atılacaq.
Raketlər “Raven” adlı mobil hava hücumundan müdafiə sistemində istifadə olunacaq. Ukraynaya daha əvvəl göndərilən səkkiz “Raven” sisteminə əlavə olaraq beş yeni yük maşını da göndəriləcək.
Nazirliyin açıqlamasında, raketlərin maliyyələşdirilməsinin, Rusiya aktivlərindən əldə olunan 70 milyon funt sterlin faiz gəliri ilə təmin edildiyi bildirilib.
İngiltərənin Baş naziri Keir Starmer məsələ ilə bağlı açıqlamasında, “Putinin qanunsuz və barbar müharibəsinin bədəlini Ukrayna yox, Rusiya ödəməlidir. Ukraynaya lazım olan hava müdafiə sistemini təmin etmək üçün Rusiya aktivlərindən gələn gəlirdən istifadə etmək tamamilə düzgün qərardır”,- deyib.
Müdafiə naziri Con Healey isə bildirib ki, Ukraynanın sülh danışıqlarında ən güclü mövqedə olması üçün müdafiə imkanları artırılmalıdır: “Rusiya şəhərlərə qarşı ayrı-seçkilik etmədən raket və dron hücumları həyata keçirir. Bu, Putinin sülhlə maraqlanmadığını göstərir. Buna görə də Ukraynanın özünü bu qırğınlardan qoruması üçün müsadirə edilmiş Rusiya aktivlərindən istifadə etmək haqlıdır”.
Açıqlamada, İngiltərənin ümumilikdə Ukraynaya 5 min raket vermə vədi də xatırladılıb.
Mədinə Cəlilova
22:30 25.06.2025
Oxunuş sayı: 742
