İtkinlərin yarısı uşaqdır: 400 minə yaxın fələstinli haradadır?
Qəzza zolağında həyatını itirənlərin sayı 56 mini keçib. İsraildə fəaliyyət göstərən Ben Qurion Universitetinin professoru Yaakov Qarbın apardığı araşdırmaya görə, 2023-cü ildən bəri təxminən 400 min fələstinli itib və onların yarısını uşaqlar təşkil edir.
Crossmedia.az xəbər verir ki, araşdırma Harvard Universitetinə bağlı “Harvard Dataverse” platformasında dərc olunub. Məkan əsaslı xəritələmə və məlumat analizinə əsaslanan hesabatda qeyd olunur ki, 2023-cü ildən əvvəl Qəzzada əhalinin sayı 2,27 milyon nəfər olduğu halda, hazırda bu rəqəm təxminən 1,85 milyona düşüb.
İsrailin rəsmi məlumatlarına görə, indiyədək 56 minə yaxın fələstinli həlak olub. Lakin professor Qarb bildirir ki, rəsmi ölənlər statistikası gerçəyi əks etdirmir və çox sayda insan dağıntılar altında qalaraq qeydə alınmayıb. O, 377 min itkin fələstinlinin əhəmiyyətli bir qisminin İsrail hərbi qüvvələri tərəfindən öldürülmüş ola biləcəyini qeyd edir.
Tibbi jurnallarda da bu fərqi təsdiqləyən elmi araşdırmalar yer alıb. Bu ilin əvvəlində The Lancet tibb jurnalında yayımlanan tədqiqatda, İsrailin Qəzzadakı hərbi əməliyyatları nəticəsində baş verən ölümlərin azı 41%-nin qeydə alınmadığı bildirilib. Eyni tədqiqatda qurbanların 59,1%-nin qadınlar, uşaqlar və yaşlılar olduğu vurğulanıb.
2023-cü ildə The Lancetdə yayımlanan başqa bir araşdırmada isə İsrailin Qəzzaya qarşı hücumlarının 149 min ilə 598 min arasında insan itkisinə səbəb ola biləcəyi qeyd olunmuşdu. Bu nəticələr Qəzzada real humanitar fəlakətin yaşandığını göstərir.
Mədinə Cəlilova
20:10 25.06.2025
Oxunuş sayı: 9618
