"İsraillə müharibə İran dövlətçiliyini gücləndirdi"- Açıqlama
İranın xarici işlər naziri Abbas Əraqçi verdiyi müsahibədə ölkəsinin nüvə proqramından imtina etməyəcəyini bildirib. O, bu istiqamətdə beynəlxalq təzyiqlərin Tehranı geri addım atmağa vadar etməyəcəyini vurğulayıb. Bu, o deməkdir ki, rəsmi Tehranın geri çəkilmək fikri yoxdur. İranın bu mövqeyi nə ABŞ-ni qane edir, nə də İsraili. Elə isə proseslər necə inkaf edəcək?
Mövzu ilə bağlı Politoloq Zaur Məmmədov Crossmedia.az-a açıqlama verib: "Son hadisələrlə bağlı bir çox təəccüblü məqamlar var. Bu məqamların əsasını ABŞ-nin əvvəldən nə istədiyi məsələsi təşkil edir.
Əslində bu, təəccüblü deyil və hər şey əvvəlcədən aydın idi. Sadəcə olaraq, bir çoxlarının müəyyən gözləntiləri var idi.
Elə bu gün səhər saatlarında yayılan məlumata görə, Pəhləvi sülaləsinin son nümayəndələrindən biri – hansı ki, İranda hakimiyyətə gəlmək istəyirdi – ABŞ Prezidenti Donald Trampı öz sosial media hesabından dostluqdan çıxarıb. Bu da bir tərəfin gözləntisi idi".
O, əlavə edib ki, eyni zamanda müxtəlif qrupların da gözləntiləri var idi: "Lakin hadisələrin gedişatı göstərdi ki, İsrail, ABŞ və İran arasında baş verən müharibədə nəticə qalibin kim olacağı ilə deyil, strateji vəziyyətin formalaşması ilə müəyyən olunur. Hər tərəf özünü qalib hesab edir. Amma görünən odur ki, İran bundan sonra da nüvə məsələlərini davam etdirə biləcək. Bu prosesdə İranın nüvə potensialı və hərbi gücü hələ də mövcuddur və bu imkanlar üzərində işlənməyə davam ediləcək.
İran rəsmisi Abbas Əraqçinin bəyanatları daxili auditoriya üçün səsləndirilmiş ola bilər. Amma eyni zamanda istisna deyil ki, bağlı qapılar arxasında başqa razılaşmalar da əldə olunub".
Politoloq əlavə edib ki, İranda dini-siyasi hakimiyyət mövcudluğunu davam etdirir: "Bu müharibə bir çox insanın həyatına son qoymasına baxmayaraq, ümumilikdə İran dövlətçiliyini gücləndirib. İsrail, ABŞ və İran arasındakı qarşıdurma onu göstərdi ki, bu savaşda nəticə qalibin kim olması ilə yox, strateji mövqelərin bölüşdürülməsi ilə nəticələnəcək”.
Fatimə Nəbiyeva
14:54 25.06.2025
Oxunuş sayı: 796
