Mütəllim Rəhimli: "Ədalət Partiyası İlham Əliyevin apardığı siyasətin doğru olduğunu düşünür" - MÜSAHİBƏ

Ədalət Partiyasının 17 mayda keçirilən IX Qurultayında partiyanın mərhum sədri İlyas İsmayılovun uzun müddət müavini olmuş Mütəllim Rəhimli bu siyasi təşkilatın sədri seçilib. O, İlyas İsmayılovun vəfatından sonra keçirilən ilk qurultayda bu vəzifəyə layiq görülüb. Partiyanın quruculuq mərhələsindən burada təmsil olunan və təşkilata, sədr İlyas İsmayılova sədaqəti ilə seçilən Mütəllim Rəhimli, təşkilatlanma işlərində fəal rolu ilə tanınıb. O, uzun illər partiyanın sədr müavini vəzifəsində çalışıb və təşkilatın inkişafında mühüm xidmətlər göstərib. Mütəllim Rəhimli artıq qurultayın qərarı ilə Ədalət Partiyasına rəhbərlik edir.

Ədalət Partiyasının yeni sədri Mütəllim Rəhimli Crossmedia.az Analitik İnformasiya Portalının redaksiyasında qonaq olub və ölkənin ictimai-siyasi gündəmi, iqtidar-müxalifət dialoqu, təşkilatın gələcək planları, siyasi proseslərə münasibəti ilə bağlı saytımızın əməkdaşlarının suallarını cavablandırıb...

- Söhbətimizə partiyanın sonuncu qurultayı ilə başlamaq istərdim. Qurultayın ümumi gedişatı sizi qane etdimi? 

- Əvvəla, dəvətinizə və maraqlı müzakirəyə görə təşəkkür edirəm. Azərbaycanda siyasi proseslərdə iştirak etmək – bu işin içində olduğuma görə demirəm – həqiqətən böyük cəsarət tələb edir. Çünki cəmiyyətimiz apolitik vəziyyətdədir. Siyasi müstəqilləşmə hələ tam inkişaf etməyib. Belə bir şəraitdə siyasi proseslərə yön verməyə çalışmaq olduqca çətin və məsuliyyətli bir işdir. Ədalət Partiyası isə Azərbaycanın siyasi həyatında yeni bir təşkilat deyil. Onun tarixi 1993-cü ildən başlayır. Doğrudur, bir müddət başqa bir partiya ilə birləşərək birgə siyasi fəaliyyət göstərdi, lakin 2000-ci ildən bəri Ədalət Partiyası yenidən müstəqil şəkildə fəaliyyət göstərir. Hazırda sıralarımızda olan üzvlərin əksəriyyəti partiyaya hələ 1993-cü ildən qoşulmuş şəxslərdir. Onların bir çoxu 2000-ci ildən sonra partiyanın fəaliyyətini bərpa edərək bu günə qədər siyasi mübarizədə iştirak edirlər. Bu insanlar kifayət qədər təcrübəli, siyasi hadisələri düzgün qiymətləndirmək və qiymət vermək bacarığına malik şəxslərdir. Onları aldadaraq, süni şəkildə yönləndirmək və ya yalan vədlərlə inandırmaq mümkün deyil. Belə bir siyasi təşkilata rəhbərlik etmək təbii ki, böyük məsuliyyət və bacarıq tələb edir. İlyas İsmayılov kimi siyasi və ictimai xadimdən sonra Ədalət Partiyasına rəhbərlik etmək mənim üçün həm böyük məsuliyyətdir, həm də şərəfdir. Onun vəfatından sonra bəziləri, o cümlədən partiyamıza dost olmayan qüvvələr belə fikirlər səsləndirirdilər ki, İlyas İsmayılov əvəzolunmazdır və onun gedişi partiyanın fəaliyyətinə son qoyacaq. Amma bizim məqsədimiz heç vaxt onu əvəzləmək olmayıb. Həyat göstərir ki, heç kəs əvəzolunmaz deyil, amma hər kəsin öz yeri və rolu var. Biz sadəcə partiyanı yeni mərhələyə aparacaq bir rəhbərlik formalaşdırmaq istəyirdik. Təbii ki, hər bir siyasi təşkilatda liderin itkisi müəyyən çaşqınlıq və qeyri-müəyyənlik yaradır. Bizim partiyamızda da belə oldu. Bəzi şəxslər iddialarını qabiliyyətlərindən üstün tutmağa çalışdılar, daxildə müəyyən anlaşılmazlıqlar yarandı. Amma bütün bu təlatümlərin arxasında duran əsas səbəb bəzi üzvlərin partiya nizamnaməsinə və siyasi partiyalar haqqında qanuna əməl etmək istəməmələri idi. Bəziləri siyasi fəaliyyəti şəxsi maraqlara tabe etdirmək cəhdləri göstərirdilər ki, bu da partiyamızın dəyərləri ilə uzlaşmırdı. Lakin partiyamızın təcrübəli üzvləri bu prosesi nəzarətə götürərək vəziyyətin sabitləşməsinə kömək etdilər. Nəticədə beş nəfər partiyadan istefa verdi. Əlbəttə, bu bizi məyus etdi. Çünki bu gün bizim dost itirmək zamanımız deyil. Hazırda Ədalət Partiyasının 5400 nəfərdən artıq üzvü var və hər bir üzv bizim üçün dəyərlidir. Onların sosial statusundan, yaşından və mövqeyindən asılı olmayaraq, partiyanı tərk etmələrini təəssüflə qarşılayırıq. Qurultaya gəlincə isə hesab edirəm ki, Ədalət Partiyasının son qurultayı Azərbaycan siyasi həyatında normal və sağlam demokratik məcrada keçdi. Bu qurultay partiyanın siyasi gücünü, potensialını və ambisiyalarını bir daha nümayiş etdirdi. Üzvlər qurultayda olduqca fəal iştirak etdilər, bütün məsələlərdə prinsipial və təşəbbüskar mövqe göstərdilər. Mənə göstərilən etimada görə partiya üzvlərinə təşəkkür edirəm. İlyas İsmayılovdan sonra məni partiya sədrliyinə layiq gördülər. Artıq bu vəzifəyə gəlməyimdən təxminən 20 gün keçir. Bu müddətdə biz partiyanın əvvəlki rəhbər heyətində olmuş şəxslərlə birlikdə Ədalət Partiyasını yenidən qurmaq, İlyas İsmayılovun siyasi kursunu davam etdirmək üçün səylə çalışırıq.

- Bundan sonrakı planlar nədən ibarət olacaq? Yeni sədr kimi hansı dəyişiklikləri həyata keçirməyi düşünürsünüz? Partiya daxilində hər hansı struktur islahatları və ya təşkilati dəyişikliklər nəzərdə tutulurmu? Eyni zamanda, partiya daxilində konkret təyinatlar olubmu və ya yaxın gələcəkdə hansı kadr dəyişiklikləri gözlənilir?

- Struktur məsələsinə gəlincə, bu, bilavasitə Ədalət Partiyasının nizamnaməsi ilə tənzimlənir. Ona görə də struktur dəyişikliyi asan məsələ deyil. Nizamnaməyə dəyişiklik etmək partiyanın yenidən qeydiyyatdan keçməsini tələb edir. Fikrimcə, Ədalət Partiyasının həm proqramı, həm də nizamnaməsi vaxtilə kifayət qədər savadlı və təcrübəli elm adamları, hüquqşünaslar, filosoflar və partiya funksionerləri tərəfindən hazırlanıb. Bu sənədlər uzunmüddətli perspektivə hesablanıb və siyasi mühitin dəyişkənliyinə tab gətirəcək səviyyədədir. Hazırda proqram və nizamnamədə hər hansı dəyişiklik zərurəti görmürük. Təbii ki, İlyas İsmayılovdan sonra idarəetmə formasında əsaslı bir dəyişiklik olmayıb. Ona görə də dəyişikliklər əsasən kadr sahəsində olacaq. Nizamnaməyə uyğun olaraq, qurultaydan sonra partiyanın bütün strukturları fəaliyyətini dayandırıb. Qurultay çərçivəsində artıq Mərkəzi Nəzarət-Təftiş Komissiyasının üzvləri, partiya sədri və Ali Məclisin üzvlərinin üçdə biri seçilib. Növbəti mərhələdə Mərkəzi Nəzarət-Təftiş Komissiyasının sədri seçiləcək. Həmçinin Ali Məclisin digər üzvləri bölgələrdən – hər rayon təşkilatından bir nəfər olmaqla – müəyyənləşdirilməlidir. Bu prosesi yaxın iki ay ərzində yekunlaşdırmağı planlaşdırırıq. Daha sonra isə partiyanın icra aparatı formalaşmalıdır. İcra aparatının – yəni partiyanın idarəetmə sisteminin – formalaşdırılması sədrin səlahiyyətindədir. Sədr kimi mən öz müavinlərimi, müşavirlərimi təyin edəcəyəm, həmçinin partiyanın Siyasi Şurasının tərkibini də müəyyənləşdirəcəyəm. Hazırda biz bu mərhələdəyik. İstəyirəm ki, bu prosesi elə şəkildə aparaq ki, partiyanın geniş kadr potensialından düzgün istifadə olunsun. Hər kəs öz bilik və bacarığına uyğun şəkildə, obyektiv əsaslarla vəzifəyə təyin olunsun. Hesab edirəm ki, bu yanaşma Ədalət Partiyasının inkişafına yalnız müsbət təsir göstərəcək.

- Seçkilərdən sonra Prezident Administrasiyasının Siyasi partiyalar və qanunvericilik hakimiyyətilə iş şöbəsinin müdiri Ədalət Vəliyevlə görüş keçirdiyiniz barədə məlumat yaydınız və qısa bir açıqlama verildi. Bu görüş barədə bir qədər daha ətraflı danışmağınızı istərdik. Görüşdə əsas müzakirə mövzuları nə idi və hansı məqamlar ön plana çəkildi?

- Bu görüş, Ədalət müəllimin Azərbaycandakı siyasi partiyalara göstərdiyi diqqətin bir nümunəsi idi. Bu diqqət, həm onun tutduğu vəzifədən, həm də şəxsi keyfiyyətlərindən qaynaqlanır. Görüş zamanı Ədalət müəllim məni Ədalət Partiyasının sədri seçilməyim münasibətilə təbrik etdi, fəaliyyətimdə uğurlar arzuladı. O, ümid etdiyini bildirdi ki, Ədalət Partiyası bundan sonra da öz fəaliyyətini Azərbaycan dövlətinin və dövlətçiliyinin qorunması istiqamətində davam etdirəcək. Təbii ki, görüş zamanı biz mərhum İlyas İsmayılovu da yad etdik. Onun siyasi fəaliyyətində dövlətçilik hər zaman əsas prinsip olub. Mən də görüşdə qeyd etdim ki, Ədalət Partiyası hər zaman dövlətin və ümummilli maraqların yanında olub, şəxsi və qrup maraqlarını ikinci planda saxlayıb. Bu xəttə sadiqliyimizi gələcək fəaliyyətimizdə də qoruyacağıq.

- Hazırda müəyyən bir qrup sizləri konstruktiv müxalifət partiyası kimi təqdim edir. Ancaq elə bir qrup da var ki, sizin kimi partiyaları “avtobus müxalifəti” adlandırır və fəaliyyətinə tənqidi yanaşır, bəzən isə təhqir edir. Bu cür yanaşmaları və adlandırmaları siz necə qiymətləndirirsiniz?

- Azərbaycanda qəribə bir siyasi bölgü formalaşıb. Bütün dünyada siyasi sistem iki əsas qütbə – iqtidar və müxalifətə bölünür. Hər iki tərəf də fəaliyyətini ölkə Konstitusiyası və mövcud qanunvericilik çərçivəsində qurur. Mən hesab edirəm ki, Azərbaycanda da müxalifət partiyalarının fəaliyyəti bu əsaslara söykənməlidir. Bu, yalnız formal deyil, həm də praktik fəaliyyət üçün vacibdir. Bəzən siyasi mühit elə bir şərait yaradır ki, partiya rəhbərləri müxtəlif məsələlərlə bağlı fərqli fikirlər səsləndirirlər. Amma təəssüf ki, bu fikirlərə görə bəzən məsuliyyətə cəlb olunurlar. Bu isə normal demokratik cəmiyyətlərdə qəbul olunmayan bir haldır. Fikir azadlığı bəzi hallarda məsuliyyətsizliklə səhv salınır. Belə düşünənlər var ki, müxalifət yalnız iqtidarın əksini deməlidir. Əgər bunu etmirsə, artıq “müxalifət” sayıla bilməz. Bu yanaşma yanlışdır və nəticədə Azərbaycanda müxalifət “radikal” və “konstruktiv” qütblərə bölünür. Bizim – Ədalət Partiyasının – məqsədi heç vaxt iqtidarın əksinə çıxmaq olmayıb. Əgər hakimiyyətin fəaliyyətində dövlət və xalq üçün müsbət nələrsə varsa, müxalifət olaraq buna dəstək vermək lazımdır. Bizim əsas missiyamız Azərbaycan dövlətçiliyini qorumaq, xalqın firavanlığını təmin etməkdir. Bunun üçün gərəkərsə, hakimiyyətlə də əməkdaşlıq mümkündür. Əksinə, radikal yanaşmaların tarixi təcrübəsi göstərib ki, onlar son nəticədə fəlakətlərə yol açır. İnqilablar bu baxımdan ən yaxşı nümunədir – onlar çox zaman ziyalı təbəqəni hədəfə alır, cəmiyyətdə dağınıqlıq yaradır. Halbuki maarifləndirmə yolu daha uzunmüddətli, amma sabit və davamlı inkişaf vəd edir. Bu yol cəmiyyətin dəyərlərini qoruyur və varisliyi təmin edir. Təəssüf ki, bəzən siyasətdə rəqibləri aşağılayan, onlara etikadan kənar adlar verən yanaşmalar da görürük. Bu, siyasət deyil. Ədalət Partiyası olaraq biz bütün siyasi qüvvələrə hörmətlə yanaşırıq. Mərhum sədrimiz İlyas İsmayılov Azərbaycan siyasətinə siyasi mədəniyyət gətirmiş şəxsiyyət idi. O, haqqında səsləndirilən böhtanlara cavab verməz, səbirli davranar və hər zaman prinsipial mövqeyini qoruyardı. Zaman da göstərdi ki, onun seçdiyi yol doğru yol idi. Biz bu siyasi xətti davam etdiririk. Biz hesab edirik ki, siyasi rəqiblərimizə qarşı dözümlü olmalıyıq. Təhqir, qaralama yolunu tutmaq olmaz. Amma həqiqət də cəmiyyətə çatdırılmalıdır. Bu, mütləqdir. Mədəni formada, arqumentlərlə, əsaslarla həqiqətin nə olduğunu insanlara izah etməliyik. Təbii ki, burada medianın rolu böyükdür. Cəmiyyətin informasiya savadlılığı yüksək deyil. Fərqli media resursları fərqli və bəzən ziddiyyətli məlumatlar yayır. İnsanlar bu informasiyaların hansının doğru, hansının yanlış olduğunu ayırd edə bilmirlər. Biz cəmiyyətə həqiqəti anlamaqda yardımçı olmalıyıq. İnsanlara dünya mediasını, eləcə də dostlarımızın və düşmənlərimizin informasiya siyasətini anlamağı öyrətmək lazımdır. Bu şəkildə cəmiyyət də düzgün qərar verə bilər. “Avtobus müxalifəti” ifadəsinə gəlincə, bu yanaşma doğru deyil. Niyə belə ifadələr ortaya çıxır? Çünki son dövrlərdə 26 siyasi partiyadan 24-ü Qarabağa səfər edib. Bu, Prezident Administrasiyasının təşəbbüsü ilə baş tutub və həmin ərazilərdə aparılan quruculuq işləri ilə tanışlıq məqsədi daşıyıb. Bütün inkişaf etmiş ölkələrdə müxalifət mühüm məsələlərdə iqtidarla birlikdə hərəkət edir. Türkiyə, ABŞ, Avropa ölkələrində belə nümunələr çoxdur. İqtidar mühüm məsələlərdə müxalifəti məlumatlandırır, dialoqa cəlb edir. Bu, siyasi varisliyin və milli həmrəyliyin təmin olunması baxımından vacibdir. Azərbaycanda da bunun ilkin nümunəsi formalaşır. Qarabağa səfər zamanı Prezidentin xüsusi nümayəndələri, Prezident Administrasiyasının şöbə müdirləri partiya rəhbərlərinə görülən işlərlə bağlı ətraflı məlumat verirlər. Biz də fikirlərimizi bildiririk – nəyi daha yaxşı edə bilərik, nəyə diqqət yetirilməlidir. Bu, siyasi dialoqun nümunəsidir. Bu yolu niyə gözdən salaq? Bu, dövlətçilik baxımından olduqca əhəmiyyətlidir və gələcəkdə digər sahələrdə də bu təcrübənin genişlənəcəyinə inanırıq. Müxalifət bu cəmiyyətin bir parçasıdır. Onlar düşmən deyil, əksinə, dövlətin və cəmiyyətin bütövlüyü üçün vacib sosial institutlardır. Bu yanaşma formalaşmalıdır və formalaşacaq.

- Siz qeyd etdiniz ki, bir sıra partiyalar bu proseslərə qoşulmur. Məsələn, iqtidar-müxalifət dialoqundan da bildiyim qədərilə onlar iştirakdan imtina ediblər. İndi gündəmdə olan məsələlərdən biri də məhz budur. Bu baxımdan onlara hər hansı bir çağırışınız varmı?

- Biz heç vaxt digər partiyaların daxili işlərinə qarışmaq niyyətində olmamışıq. Hər bir siyasi partiyanın öz siyasəti, baxışı və yanaşma tərzi var. Ədalət Partiyasının da öz ideoloji platforması mövcuddur. Bu, o demək deyil ki, Azərbaycandakı və ya dünyadakı partiyalar bir-birinə tamamilə oxşardır. Bəli, siyasi spektrdə ümumi istiqamətlər – sağ, sol, mərkəz kimi bölgülər var, lakin ideoloji platformanı həyata keçirmək yolları müxtəlif və fərqlidir. Mən düşünürəm ki, Azərbaycanda fəaliyyət göstərən siyasi partiyaların mövqeyinə, fəaliyyət istiqamətinə ən doğru qiyməti zaman verəcək. Zaman göstərəcək ki, kim haqlıdır, kim yanılır. Bu baxımdan seçkilər ən obyektiv dəyərləndirmə imkanıdır. Ümumiyyətlə, əgər bir siyasi partiya hakimiyyətə gəlmək istəmirsə, bu zaman onun siyasi partiya yox, ictimai təşkilat kimi fəaliyyət göstərməsi daha uyğun olar. Ədalət Partiyası isə Azərbaycanın siyasi həyatında fəal şəkildə iştirak etmək, iqtidara gəlmək istəyən bir partiyadır. Biz maksimalist yanaşmadan uzağıq. Vaxtilə İlyas İsmayılov da dəfələrlə vurğulayıb ki, siyasət reallıqlar üzərində qurulmalıdır. Böyük arzularla çıxış etmək asandır, lakin reallığı dərk edib ona uyğun addımlar atmaq əsl siyasi məsuliyyətdir. Ədalət Partiyası real hədəflərlə yerli özünüidarəetmə orqanlarında – bələdiyyələrdə təmsil olunmağa, qarşıdan gələn parlament seçkilərində iştirak etməyə və parlament partiyası olmağa layiqdir. Bu istiqamətdə fəaliyyətimizi davam etdiririk.

- Partiyanız parlamentdə neçə deputat yerini hədəfləyir? 

- Ədalət Partiyasının sədri kimi bu vəzifədə yeniyəm. Bu suala konkret rəqəmlərlə cavab vermək çətindir. Lakin bizim zaman-zaman keçirilən seçkilərdə iştirakımız deməyə əsas verir ki, Ədalət Partiyası parlamentdə təmsil olunmağa layiqdir. Vaxtilə İlyas İsmayılovun sədrliyi dövründə Ədalət Partiyası parlamentdə effektiv fəaliyyət göstərib, müxtəlif qanunvericilik təşəbbüsləri irəli sürüb və mövcud qanunlara dəyişiklik təklifləri verib. Bütün bu addımlar isə Azərbaycan dövlətinin və cəmiyyətinin maraqlarına xidmət edib. Düşünürəm ki, bu gün də Ədalət Partiyası öz intellektual və siyasi potensialı ilə parlamentdə və digər idarəetmə strukturlarında təmsil oluna bilər. Niyə də olmasın? Bizim baxışlarımız və yanaşmalarımız fərqlidir, lakin bu fərqlilik Azərbaycanın idarəçiliyinə rəng qatacaq, daha yaradıcı və pozitiv bir yanaşma gətirəcək. Təbii ki, bu, həm bizim arzumuzdur, həm də bu istiqamətdə apardığımız siyasi mübarizənin bir hissəsidir. Hədəflərimizin bir qismi zamanla gerçəkləşə bilər, digərləri üzərində isə daha çox çalışmaq tələb olunur. Qərarlar əsasında bəzi icra strukturlarında dəyişikliklər baş verir. Amma düşünürəm ki, bu məsələyə geniş yanaşmaq lazımdır. Bəzən bacarıqlı kadrlar yalnız siyasi mənsubiyyətə görə kənarda qalır. Bu isə nə dövlət, nə də cəmiyyət üçün xeyirlidir. Belə insanları qorumaq və onların potensialından səmərəli istifadə etmək vacibdir. Onlar xalqımız üçün dəyərdir və bu dəyər dövlət quruculuğunda istifadə olunmalıdır.

- Qeyd etdiyiniz kimi, cəmiyyətin bir hissəsi apolitikdir. Belə şəraitdə partiya fəaliyyəti ilə məşğul olmaq, seçkilərə hazırlıq aparmaq və cəmiyyəti təşkilatlandıraraq aktivləşdirmək nə dərəcədə mümkündür? Bu prosesi necə həyata keçirəcəksiniz?

- Dünya tarixində müharibələr dövründə ən dağıdıcı və təsirli silahların ixtira edildiyini görürük – istər avtomat, istər raket və digər texnologiyalar. Siyasi proseslər sabit və stabil olduqda – məsələn, Avropa cəmiyyətlərində olduğu kimi – yeni ideyaların və ixtiraların ortaya çıxması daha çətin olur. Bu cəmiyyətlər artıq formalaşmış qanunlar çərçivəsində idarə olunur və həmin qaydaların icrası ilə məşğuldurlar. Azərbaycan kimi inkişaf etməkdə olan və mürəkkəb proseslərdən keçən cəmiyyətlərdə isə yenilik etmək mümkündür. Düzdür, bu cəmiyyətdə fəaliyyət göstərmək asan deyil – müəyyən çətinliklər, maneələr, bəzən də təzyiqlər olur. Amma məhz bu çətinliklər insan potensialını üzə çıxarır. Çünki insan halı, insan hüquqları və yaradıcı təfəkkür çətinliklərdən doğur. Ona görə də hesab edirəm ki, hazırda apolitik görünsə də, müasir Azərbaycan cəmiyyətində siyasi münasibətlərin kifayət qədər formalaşdığı bu mərhələdə böyük və mühüm yeniliklər etmək mümkündür.

- Hazırda Azərbaycan qalib dövlət statusundadır və Ermənistanla sülh sazişinin imzalanması istiqamətində danışıqlar aparılır. Azərbaycan dövlətinin və xalqının lideri olan Prezident İlham Əliyev tərəfindən aparılan bu siyasəti necə qiymətləndirirsiniz? 

- Siz bilirsiniz, Ədalət Partiyasının mərhum sədri İlyas İsmayılov SSRİ məkanında siyasi fəaliyyət göstərmiş iki azərbaycanlıdan biri idi. O, dünyanın azı üçdə birində qərarların qəbuluna təsir göstərmək imkanı verən vəzifələrdə çalışıb. İlyas müəllim də 2020-ci ildə başlayan Vətən müharibəsi zamanı və ondan sonrakı dövrdə də çıxışlarında bildirirdi ki, indiki mərhələdə bu prosesi ən yaxşı idarə edə biləcək şəxs Prezident İlham Əliyevdir. Azərbaycanda Ədalət Partiyası məhz bu birliyə və həmrəyliyə dəstək verən ilk siyasi qurumlardan biridir. Partiyanın mövqeyi partiyaların fərdi maraqlarından üstün olaraq ümummilli maraqları önə çəkir. Mən hesab edirəm ki, Qarabağ münaqişəsi də bu baxımdan mühüm məsələdir və burada Ədalət Partiyası Prezident İlham Əliyevin apardığı siyasətin doğru və məqsədyönlü olduğunu düşünür. Bu proses İlham Əliyev tərəfindən uğurla başlayıb və indiyə qədər də davam edir. 2020-ci ildə və daha sonra 2023-cü ildə həyata keçirilən hərbi əməliyyatların nəticəsində Azərbaycan ərazisinin bütövlüyü, suverenliyi tam bərpa olundu. Bu, Azərbaycan xalqının ən böyük arzusudur və buna qətiyyən zərər verməmək lazımdır. Bu uğur, eyni zamanda, tarixdə Azərbaycanın mövqeyinin möhkəmlənməsinin mühüm bir mərhələsidir. Rəqib ölkənin də adını qeyd etməkdə pis heç nə yoxdur; bu, sadəcə faktların tanınmasıdır və bir növ sənəd kimi qəbul edilməlidir. Hazırda Ermənistanla aparılan sülh danışıqları prosesi də Azərbaycan iqtidarının 2020-ci ildən başlayaraq davamlı dəstəyi və diqqəti ilə gedir. Bu proses çox mürəkkəb və dəyişkən bir dövrdə, regionda və dünyada talelərin yenidən formalaşdığı vaxtda həyata keçirilir. Azərbaycan iqtidarı bu mürəkkəb situasiyanı düzgün qiymətləndirir və milli maraqlara uyğun qərarlar verir. Ermənistanla sülh sazişi, Zəngəzur dəhlizi məsələləri, milli əməkdaşlıq baxımından önəmli mövzulardır. Bu məsələlərdə ölkəmizin vahid mövqedən çıxış etməsi vacibdir. Ədalət Partiyası hesab edir ki, Azərbaycan hakimiyyəti apardığı siyasətlə milli maraqlara uyğun uğurlu nəticələr əldə edir və bu istiqamətdə alternativ fikirlərə çox yer verilməməlidir. Əlbəttə, biz avtoritarizmə qarşıyıq, amma əgər başqa layihə və ya alternativ təklif varsa, onu da ortaya qoymaq lazımdır ki, daha doğru qərar qəbul olunsun. Zaman-zaman Azərbaycanda siyasi partiyalar, o cümlədən Ədalət Partiyası bu mövzularda öz fikirlərini bildirir, şərhlər və bəyanatlar verir. Həqiqi fikirlərin toqquşması nəticəsində daha sağlam qərarlar meydana gəlir. Biz də bu proseslərin içindəyik və onun iştirakçılarından biri olaraq öz töhfəmizi verməyə çalışırıq. Ümumilikdə, Azərbaycan Prezidentinin apardığı siyasəti və Qarabağ ətrafında gedən prosesləri Ədalət Partiyası düzgün və milli maraqlara uyğun hesab edir və bu prosesin uğurla nəticələnməsi üçün birlikdə çalışmaq zəruridir.

- Prezident İlham Əliyev son otuz ildə Azərbaycanın ən böyük problemi olan Qarabağ məsələsini və son yüz ildə Xankəndidəki separatizm problemini həll etmiş liderdir. Cəmiyyətin müəyyən bir hissəsi hesab edir ki, həm bu faktı, həm də hazırda regiondakı, dünyadakı təlatümləri nəzərə alaraq İlham Əliyevin hakimiyyətdə daha uzun müddətdə qalması zəruridir. Buna görə də həmin qrup ölkə prezidentinin gələcək statusunun fərqli, daha üstün formada olmasını təklif edir. Bu cür müzakirələrə və təkliflərə münasibətiniz necədir?

- Bilirsiniz, cəmiyyət müxtəlif düşüncələrdən və fərqli baxışlardan ibarətdir. Bəzən şəxsi maraqlar, bəzən isə ictimai meyarlar bu düşüncələrin formalaşmasına təsir edir və hər birinə hörmətlə yanaşmaq lazımdır. Lakin indi Azərbaycan Konstitusiyası və qanunları mövcuddur və biz məhz bu qanunlara əməl etməliyik. Hesab edirəm ki, Azərbaycanın gələcəyi qanunlara nə dərəcədə əməl edilməsindən asılıdır. Dünya tarixində buna bənzər nümunələr çoxdur. Məsələn, ABŞ-da iki müddətdən artıq prezidentlik etmiş şəxslər müharibə bitəndən sonra rəsmi fəaliyyətlərini dayandırıblar. İngiltərədə isə Çörçil müharibə dövründə qalibiyyət qazandıqdan sonra etimadını itirib, başqa liderlərə yol vermişlər. Biz gələcəyi çox müzakirə edirik, amma bu bəzən bu müzakirələr bu günü qurmağa mane olur. Düzdür Azərbaycan Şərq ölkəsidir və bu baxımdan özünü tanımalı, öz qərarını özü verməlidir. Türkiyə kimi qardaş ölkələrin nümunələri də diqqətə layiqdir. Mən düşünürəm ki, bu məsələ siyasi partiyaların təkidilə deyil, Azərbaycan xalqının öz iradəsi ilə həll olunmalıdır.

Müsahibəni hazırladı: 

Fatimə Nəbiyeva