Deputat: Azərbaycan enerjini diplomatik alət və strateji üstünlük kimi istifadə edir
Azərbaycanın enerji siyasətində oynadığı mühüm rol bir daha “Bakı Enerji Həftəsi” çərçivəsində təsdiqləndi. Bu tədbir ölkənin qlobal enerji bazarındakı strateji mövqeyini nümayiş etdirməklə yanaşı, beynəlxalq tərəfdaşlıq əlaqələrinin dərinləşməsinə də şərait yaradır. Forum enerji təhlükəsizliyi, yaşıl keçid və davamlı inkişaf kimi aktual məsələlərin müzakirə olunduğu mühüm platformaya çevrilib. Bu barədə Milli Məclisin deputatı Pərvanə Vəliyeva Crossmedia.az-a açıqlama verib.
P.Vəliyevanın sözlərinə görə, 39 ölkədən 267 şirkət nümayəndəsinin iştirakı ilə keçirilən bu tədbir təkcə regionun deyil, eyni zamanda beynəlxalq ictimaiyyətin də diqqət mərkəzində olub. O bildirib ki, artıq illərdir davam edən və ənənəyə çevrilmiş “Bakı Enerji Həftəsi” hökumətləri, transmilli şirkətləri və sənaye ekspertlərini bir araya gətirən strateji platforma kimi formalaşıb.
Deputatın sözlərinə görə, Prezident İlham Əliyevin tədbirin açılış mərasimindəki çıxışı Azərbaycanın neft strategiyasının tarixi inkişaf yolunu və bu sahədəki mütərəqqi nailiyyətləri əhatə edib. Pərvanə Vəliyeva qeyd edib ki, əsası Ümummilli Lider Heydər Əliyev tərəfindən qoyulmuş enerji siyasəti bu gün müasir dövrün çağırışlarına uyğun şəkildə inkişaf etdirilir.
Pərvanə Vəliyeva bildirib ki, 1994-cü ildə imzalanmış “Əsrin müqaviləsi” və həmin dövrdə beynəlxalq neft şirkətləri ilə qurulan əməkdaşlıq Azərbaycanın enerji sektorunun əsasını təşkil edib. Onun sözlərinə görə, bu proseslər nəticəsində ölkə iqtisadiyyatının dirçəlməsi və beynəlxalq investorların cəlb olunması mümkün olub.
Deputat vurğulayıb ki, Azərbaycan bu gün yalnız karbohidrogen ehtiyatlarının ixracatçısı deyil, həm də strateji enerji dəhlizlərinin təşəbbüskarı və reallaşdırıcısıdır. O qeyd edib ki, Cənub Qaz Dəhlizi, Bakı-Tbilisi-Ceyhan, TANAP kimi mühüm boru kəmərləri regionun və Avropanın enerji təhlükəsizliyində həlledici rol oynayır.
P.Vəliyeva əlavə edib ki, bununla yanaşı, Azərbaycan yaşıl enerjiyə keçid istiqamətində də ciddi addımlar atır. Onun sözlərinə görə, ölkənin hədəfi 2030-cu ilə qədər 6.5 giqavat həcmində bərpaolunan enerji istehsal gücünə nail olmaq və ümumi enerji balansında bu mənbələrin payını əhəmiyyətli dərəcədə artırmaqdır.
Deputat bildirib ki, enerji sahəsindəki uğurlar Azərbaycanın maliyyə sabitliyi və siyasi etibarlılığı ilə də birbaşa əlaqəlidir. O qeyd edib ki, hazırda xarici borcun ÜDM-də payı cəmi 7 faizdən az, yoxsulluq səviyyəsi isə 5 faizdir. Bu göstəricilər ölkənin iqtisadi idarəçiliyinin nə qədər düzgün aparıldığını göstərir.
Pərvanə Vəliyevanın sözlərinə görə, Bakı Enerji Həftəsində çıxış edən beynəlxalq rəsmilər və transmilli şirkət rəhbərləri Azərbaycanın enerji sahəsindəki mövqeyini yüksək qiymətləndirib və ölkənin etibarlı tərəfdaş kimi qəbul olunduğunu vurğulayıblar. O xüsusi olaraq Böyük Britaniya, ABŞ, Avropa İttifaqı və Türkiyə rəsmilərinin çıxışlarını qeyd edərək bildirib: “Azərbaycan beynəlxalq enerji bazarında etibarlı tərəfdaş kimi qəbul olunur və bu mövqe daim güclənir".
Deputat əlavə edib ki, bununla yanaşı, ötən il Bakıda keçirilmiş COP29-un nəticələri – o cümlədən İtki və Zərər Fondunun genişləndirilməsi, karbon bazarının işlək vəziyyətə gətirilməsi və Qlobal Şimal-Cənub körpüsünün qurulması – Azərbaycanın yalnız enerji ixracatçısı deyil, eyni zamanda qlobal iqlim diplomatiyasının da fəal iştirakçısı olduğunu göstərir.
Sonda Pərvanə Vəliyeva vurğulayıb ki, Azərbaycan enerjini təkcə iqtisadi resurs kimi deyil, eyni zamanda diplomatik alət və strateji üstünlük vasitəsi kimi istifadə edir. O qeyd edib: “Bu yanaşma ölkəmizin həm regional, həm də beynəlxalq miqyasda mövqeyini möhkəmləndirir və onu enerji siyasətinin formalaşmasında aparıcı aktora çevirir".
Fatimə Nəbiyeva
12:33 06.06.2025
Oxunuş sayı: 9679
