Maska düşdü: Azərbaycanı hədəf alanların arxasında ermənilər dayanır
Azərbaycan Respublikasının Vətən müharibəsində əldə etdiyi tarixi Zəfər və ardınca suverenliyini tam bərpa etməsi Cənubi Qafqazda yeni geosiyasi reallıqlar formalaşdırıb. Ölkəmizin müstəqil xarici siyasət yürütməsi və regional şərtləri müəyyənləşdirən aparıcı aktora çevrilməsi isə xarici anti-Azərbaycan mərkəzlərinin, eləcə də revanşist dairələrin sistematik müqaviməti ilə müşayiət olunur. Son dövrlər əsassız şəkildə dövlətimizə və şəxsən Prezident İlham Əliyevə qarşı xarici informasiya resurslarında, eləcə də sosial media platformalarında aparılan çirkin kampaniyanın intensivləşməsi cəmiyyətdə haqlı olaraq bu sualı doğurur: Bu qədər dərin qərəz və hədəfli hücumların arxasında erməni lobbisi, yoxsa onlara ideoloji və siyasi simpatiya bəsləyən transmilli şəbəkələr durur? Mövcud mənzərə göstərir ki, hərbi-siyasi müstəvidə məğlub olan qüvvələr bu dəfə milli-mənəvi dəyərlər, süni şəkildə aktuallaşdırılan sosial məsələlər və dini manipulyasiyalar üzərindən cəmiyyətdə daxili konfrontasiya yaratmağa cəhd edirlər. Lakin Azərbaycan dövləti və cəmiyyəti bu pərdə altında gizlənən hibrid ideoloji təhdidlərin fərqindədir və onlara qarşı adekvat müqavimət nümayiş etdirir.
Mövzu ilə bağlı Crossmedia.az-a açıqlama verən Milli Məclisin deputatı Hikmət Babaoğlu bildirib ki, Azərbaycan həmişə müxtəlif ideoloji təxribatlarla üz-üzə qalıb, bunların hamısının öhdəsindən gələrək böyük tarixi Zəfər əldə edib.
Hikmət Babaoğlu qeyd edib ki, Azərbaycanın hazırda güclü dövlətə çevrilməsi, regional şərtləri diktə etməsi bizə qarşı olan qüvvələri yenidən hərəkətə gətirib. Bu dəfəki təxribat kampaniyasının miqyası və metodları bir qədər fərqli olsa da, Azərbaycan cəmiyyəti bunun hamısını görür və dövlətimiz bu siyasi-ideoloji, dini-ideoloji təxribatlara layiqincə cavab verir. Deputat vurğulayıb ki, bizə qarşı təxribatların arxasında erməni-fars şovinizmi, Türkiyədə olan camaat zehniyyətini mənimsəmiş gülənçi ideologiya və Azərbaycanın güclənməsini istəməyən digər islamofob mərkəzlər dayanır: “Azərbaycan həmişə İslam həmrəyliyini təmin etmək üçün əlindən gələni edib və İslam dünyasına müsəlman məscidlərini 21-ci əsrdə vandalizmdən xilas edən ölkə kimi adını yazdırıb. Məhz Qarabağ torpaqlarında məscidlərimizi xilas edən bir dövləti dırnaqarası dindarlıqla, dini manipulyasiya edərək vurmağa çalışanların ideoloji silahının arxasında heç şübhəsiz ki, erməni izi görünür”.
Politoloq Tofiq Abbasov isə açıqlamasında bildirib ki, adətən belə kampaniyalar meydana gələndə bir qədər səbir göstərmək lazımdır ki, onların qaynaqlandığı mənbələr tam bəlli olsun.
Politoloq vurğulayıb ki, bu prosesin arxasında erməni, qərbli, türk və ya başqalarının durmasından asılı olmayaraq, əsas məqam Azərbaycanın müstəqil siyasət yürütməsi, suveren hüquqlarından istifadə etməsi və ölkənin beynəlxalq nüfuzunun artmasıdır: “Məhz buna görə bədxahlar və gözügötürməyənlər səylərini birləşdirərək mənfur bir kooperasiya yaradırlar. Onlar Azərbaycanın dözümünü, sağlam yanaşmalarını və tolerantlığını həzm edə bilmirlər”.
Tofiq Abbasov qeyd edib ki, hücum edənlər özləri üçün qarşıdurma cəbhəsi açaraq sağlam cəmiyyətimizi gözdən salmağa çalışırlar, lakin bu qaralama kampaniyasının müəllifləri sonunda özləri üzüqara olacaqlar: “Süni şəkildə yaradılmış bu cür ziddiyyətli mövzular sadəcə bəhanədir. YAP-ın VIII Qurultayında Prezident İlham Əliyev məhz həmin qüvvələrə səslənərək bəyan etdi ki, bizə dərs öyrətməyin, standartlarınızı sırımayın və minnət qoymayın; çünki əldə etdiyimiz Zəfər öz zəhmətimizin, şəhidlərimizin qəhrəmanlığının və xalqımızın birliyinin nəticəsidir”.
Politoloq əlavə edib ki, biz tarixin işıqlı tərəfindəyik, qorxu hissi bizə yaddır və bu cür iyrənc kampaniyalar Azərbaycanın inkişafına heç bir maneə yarada bilməz.
Zeynəb Həsən
20:50 14.10.2026
Oxunuş sayı: 96
