Xarici xəbərlər
Ümit Özdağ: Azərbaycan-Türkiyə qardaşlığı qorunmalıdır
Azərbaycan-Türkiyə münasibətləri, Azərbaycanın İsraillə əlaqələri və Türkiyədə Azərbaycan əleyhinə səsləndirilən fikirlər iki ölkə arasında qarşılıqlı hörmət və müttəfiqlik məsələsini yenidən gündəmə gətirib. Türkiyədə Azərbaycanın suveren xarici siyasət qərarlarına hörmətlə yanaşılması, Qarabağ müharibəsində qələbənin Azərbaycan xalqına və ordusuna məxsusluğunun qəbul edilməsi, eləcə də Azərbaycan əleyhinə təhqiramiz paylaşımlara hüquqi münasibət göstərilməsi ilə bağlı çağırışlar səsləndirilib.
Türkiyənin Zəfər Partiyasının sədri Ümit Özdağ Azərbaycan-Türkiyə münasibətləri, Azərbaycanın İsraillə əlaqələri və Türkiyədə Azərbaycan əleyhinə səsləndirilən fikirlərlə bağlı mediaya açıqlama verib.
Özdağın sözlərinə görə, Azərbaycanın İsraillə münasibətlərinə görə tənqid edilməsi ədalətli yanaşma deyil: “Azərbaycanı İsraillə münasibətlərinə görə tənqid etmək haqqımız olmadığı kimi, bu, haqlı bir tənqid də deyil. Azərbaycanın suveren dövlət olaraq İsraillə münasibətlərinin öz səbəbləri var və bu münasibətlər Azərbaycan baxımından da əsaslandırıla bilər. Azərbaycan xalqı Türkiyənin Fələstinə yaxın siyasətinə görə ‘Qardaş Türkiyə niyə Fələstinə bu qədər yaxındır?’ deyə soruşmadığı halda, bizim İsraillə münasibətlər üzərindən Azərbaycanı günahlandırmağımız ədalətlə uzlaşmır”.
Partiya sədri İsraillə münasibətlərin qiymətləndirilməsində yalnız beynəlxalq platformalardakı mövqelərin deyil, iqtisadi əlaqələrin də nəzərə alınmalı olduğunu vurğulayıb: “İsraillə münasibətlərin ölçüsü niyə Birləşmiş Millətlər Təşkilatının zalındakı nümayəndə olmalıdır? Məsələn, İsraillə ticarət əlaqələri daha ədalətli meyar olmazmı? İsraillə münasibətlər məsələsində təsəvvür edilə biləcək meyarların böyük əksəriyyətində AK Parti iqtidarının Azərbaycan rəhbərliyi ilə müqayisədə İsraillə daha yaxşı münasibətlərə malik olduğu qənaətindəyəm”.
O, Türkiyənin Qarabağ müharibəsi zamanı Azərbaycana verdiyi dəstəyin əhəmiyyətini vurğulamaqla yanaşı, qələbənin əsas sahibinin Azərbaycan xalqı və ordusu olduğunu bildirib: “Türkiyə Qarabağ müharibəsi zamanı Azərbaycana siyasi, diplomatik və hərbi dəstək verib. Türkiyənin bu dəstəyi Azərbaycanın üzləşə biləcəyi beynəlxalq təzyiqlərin qarşısının alınmasına və ya azalmasına kömək edib. Hərbi uğura da böyük töhfəmiz olub. Ancaq müharibəni Azərbaycan türkləri qazanıb. Qarabağı Azərbaycan ordusu geri alıb və qələbəyə öz gücü ilə nail olub”.
Özdağın fikrincə, qələbə ilk növbədə Azərbaycan ordusuna, daha sonra isə bir yumruq kimi birləşən Azərbaycan xalqına məxsusdur: “Bu qələbənin yalnız qürurunu yaşamaq bizə düşüb. Azərbaycan xalqı isə bu qüruru bizimlə səxavətlə bölüşüb. Qələbə tədbirlərində Azərbaycan bayrağı ilə yanaşı, Türkiyə bayrağı da dalğalanıb”.
O, Türkiyə və Azərbaycan arasında münasibətlərin pozulmasını istəyən qüvvələrin olduğunu iddia edərək, Türkiyədə Azərbaycan əleyhinə çıxışlara və sosial media paylaşımlarına qarşı mövqe nümayiş etdirilməsinin vacibliyini bildirib: “İndi bəziləri Türkiyə ilə Azərbaycan arasında münasibətlərin pozulmasını istəyir. Azərbaycan küçədə, mediada və ya sosial şəbəkələrdə Türkiyəyə qarşı dil uzatmırsa, qardaşlığın tələbi də budur. İndi bizim də üzərimizə düşəni etmək vaxtıdır. Türkiyədə də heç kimin Azərbaycana qarşı hörmətsizlik etməyəcəyini göstərməliyik. Azərbaycan əleyhinə paylaşımlar edən təxribatçılara və trollara layiq olduqları cavabı verməliyik”.
Partiya sədri Türkiyə hakimiyyətini də bu məsələdə addım atmağa çağırıb. O, Azərbaycan əleyhinə təhqiramiz paylaşımlar edən sosial media hesablarına qarşı qanuni tədbirlərin görülməli olduğunu düşünür: “AK Parti iqtidarına da səslənirəm: Müxalif jurnalistlərə və siyasətçilərə qarşı sərt şəkildə tətbiq olunan dezinformasiya qanunu sosial mediada Azərbaycan əleyhinə paylaşımlar edən trollara da tətbiq edilməlidir. Azərbaycana söyən, təhqir edən hesablar bağlanmalı, onların sahiblərinə qarşı hüquqi prosedurlar başladılmalıdır. Türkiyə Azərbaycana təhqir etməyin sərbəst olduğu ölkə deyil”.
Özdağ Azərbaycan-Türkiyə qardaşlığının siyasi liderlərdən və konkret müharibələrdən daha qədim olduğunu bildirərək, bu münasibətlərin qorunmasının vacibliyini vurğulayıb: “Azərbaycan bizim can qardaşımızdır. Dünyadakı bütün ölkələr belə bir can qardaşa sahib olmaq üçün hər şeylərini verərdilər. Bu qardaşlığın dəyərini bilməliyik. Eyni zamanda, qardaşa yalnız sevgi deyil, hörmət də göstərməyi öyrənməliyik. Azərbaycan həm xalq, həm də dövlət olaraq sevgimizə və hörmətimizə layiqdir. Azərbaycana hörmət etmək özümüzə hörmət etmək deməkdir”.
O, çıxışında Azərbaycan-Türkiyə münasibətlərinin İlham Əliyev və Rəcəb Tayyib Ərdoğanla başlamadığını, tarixi köklərə söykəndiyini də qeyd edib: “Türkiyə ilə Azərbaycan arasındakı qardaşlıq nə İlham Əliyevlə, nə də Rəcəb Tayyib Ərdoğanla başlayıb. Müttəfiqliyimiz də Qarabağ müharibəsi ilə başlamayıb. Bizim qardaşlığımızın və müttəfiqliyimizin dörd min il əvvəl Tanrı dağlarının ətəklərində başladığını düşünürəm. Türkiyədə Azərbaycana olan sevgi təsəvvür etdiyinizdən qat-qat böyükdür”.
Sonda partiya sədri Qarabağın azad edilməsinə və Azərbaycanın ərazi bütövlüyünün bərpasına Türkiyənin də Azərbaycan xalqı qədər sevindiyini bildirib: “Qarabağın azadlığına və Azərbaycanın ərazi bütövlüyünün bərpasına biz də sizin qədər sevinirik. Qəhrəman ordunuzla birlikdə biz də qələbə qazanmış kimi hiss edirik. Böyük Atatürkün ifadə etdiyi kimi, kədəriniz kədərimiz, sevinciniz sevincimizdir”.
21:45 14.10.2026
Oxunuş sayı: 79
