DİM: Kənd rayonlarının bir çox fənlər üzrə göstəriciləri Bakı və Sumqayıtı qabaqlayır
Kənd rayonlarının bir çox fənlər üzrə göstəriciləri Bakı və Sumqayıt şəhərlərinin göstəricilərini qabaqlayır.
Crossmedia.az xəbər verir ki, bu barədə Dövlət İmtahan Mərkəzinin nəşr etdiyi 2024-2025-ci tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların əks olunduğu “Abituriyent 12” jurnalında qeyd olunub.
Hesabata əsasən, ölkənin ayrı-ayrı bölgələrini təmsil edən abituriyentlərin imtahan fənləri üzrə cavablarının təhlili göstərir ki, ən yüksək nəticə əsasən, birbaşa Elm və Təhsil Nazirliyinin tabeliyində olan liseylərə və özəl liseylərə məxsusdur.
Fənlər üzrə şəhər və rayon təhsil sektorlarının göstəricilərinin təhlilindən aydın olur ki, kənd rayonlarının bir çox fənlər üzrə göstəriciləri Bakı və Sumqayıt şəhərlərinin göstəricilərini qabaqlayır.
Belə rayonlara misal olaraq Cəbrayıl, Ağdaş, Salyan, Qubadlı, Qəbələ, Tovuz, Bərdə, İsmayıllı, Culfa, Ordubad, Şəki, Masallı, Göyçay, Cəlilabad, Saatlı, İmişli, Neftçala, Ağstafa, Gədəbəy, Yevlax, Yardımlı, Zaqatala, Füzuli və Şərur rayonlarını göstərmək olar. Bunun obyektiv səbəblərindən biri kimi qəbul imtahanlarında bu şəhərlərin məzunlarının daha çox hissəsinin, rayonların isə yalnız hazırlıqlı məzunlarının iştirak etməsini göstərmək olar.
Məsələn, keçən il Bakı şəhəri üzrə məzunların 92,19%-1, Sumqayıt şəhəri üzrə 94,14%-i qəbul imtahanlarında iştirak edib. Yüksək göstəricili rayonlar üzrə (Qubadlı, Ordubad, Cəbrayıl, Şərur, Culfa, Tovuz, Ağdaş və Ağstafa rayonları istisna olmaqla) isə məzunların ən yaxşı halda 69-84%-i ali təhsil müəssisələrinə sənəd verib.
Azərbaycan bölməsində ana dili və riyaziyyat fənləri üzrə İsmayıllı rayonunun, ədəbiyyat fənni üzrə Gədəbəy rayonunun, fizika fənni üzrə İmişli rayonunun, kimya fənni üzrə Bərdə rayonunun, biologiya fənni üzrə Sumqayıt şəhərinin, tarix fənni üzrə Ağstafa rayonunun, coğrafiya fənni üzrə Saatlı rayonunun, informatika fənni üzrə isə Qəbələ rayonunun abituriyentləri üstünlük əldə edib.
Rus bölməsi abituriyentlərinin böyük əksəriyyətini Bakı, Mingəçevir, Sumqayıt və Gəncə şəhərlərinin məzunları təşkil etdiyindən yüksək göstəricilər də bu şəhərlər arasında paylanıb.
Şübhəsiz, bu göstəricilər müvafiq şəhər və rayonların təhsil orqanları və müəssisələrinin səmərəli fəaliyyətinin nəticəsidir. Onların iş təcrübəsini respublika miqyasında yaymaq müvafiq elmi-metodik mərkəzlərin və mütəxəssislərin ümdə vəzifələrindən biri olmalıdır. Bundan bütövlükdə respublikanın təhsil sistemi qazanar.
10:12 03.06.2025
Oxunuş sayı: 10232
