İşğaldan azad edilmiş ərazilərimiz dünyanın ən güclü təhsil sisteminə malik bölgələrindən birinə çevriləcək - AÇIQLAMA
İşğaldan azad edilmiş ərazilərdə təhsil sahəsinin inkişafı sürətlə davam edir. Bu proses ölkənin maarifçilik strategiyasının mühüm hissəsini təşkil edir. Elm və təhsil naziri Emin Əmrullayev Qarabağ Təhsil və Tərəfdaşlıq Forumu çərçivəsində verdiyi açıqlamada, bölgədə 20-dən çox təhsil müəssisəsinin fəaliyyət göstərdiyini və növbəti tədris ilində bu sayın 40-ı ötəcəyini bildirib.
Qeyd edək ki, bu yalnız şəhər məktəbləri ilə məhdudlaşmayacaq — kənd yerlərində də yeni məktəblərin tikintisi həyata keçiriləcək. Bu da bölgənin təhsil imkanlarını genişləndirərək gənc nəslin keyfiyyətli təhsil almasına töhfə verəcək.
Mövzu ilə bağlı Crossmedia.az-a açıqlama verən Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri, təhsil eksperti İlqar Orucov ilk olaraq bildirib ki, Böyük Qayıdış konsepsiyasında həmçinin işğaldan azad edilmiş yenidən qurulan ərazilərin təhsil infrastrukturunun ən müasir səviyyədə qurulması nəzərdə tutulur və bu istiqamətdə əməli işlərə başlanılıb:
“Müzəffər Ali Baş Komandan, cənab Prezident İlham Əliyevin müəllifi olduğu Böyük Qayıdış konsepsiyasında işğaldan azad olunmuş ərazilərdə təhsilin bütün pillələrinin inkişaf etdirilməsi və yeni təhsil infrastrukturunun qurulması xüsusi yer tutur. Biz artıq görülən işlərin nəticələrini müşahidə edirik. İşğaldan azad edilmiş ərazilərdə, cənab nazir Emin Əmrullayevin də qeyd etdiyi kimi, artıq 20-dən çox təhsil müəssisəsi fəaliyyət göstərir. Növbəti tədris ilində bu sayın iki dəfə artacağı qeyd olunur. Hesab edirəm ki, bu işlər bütövlükdə ərazilərin yenidən qurulması və Qarabağın dirçəldilməsində təhsilin mühüm rolunu göstərir. Ağıllı şəhər və kənd infrastrukturunun inkişafı ilə yanaşı, təhsilin bu ərazilərdəki mövqeyi ölkəmizin gələcək inkişafında mühüm əhəmiyyət kəsb edir”.
İ.Orucov vurğulayıb ki, Cənab Prezident tərəfindən bütün sosial sahələrə, eyni zamanda təhsil sahəsinə göstərilən diqqət və qayğı, işğaldan azad edilmiş bölgələrdə də öz əksini tapır:
“Heydər Əliyev Fondunun prezidenti, ölkəmizin Birinci vitse-prezidenti Mehriban xanım Əliyevanın “Yeniləşən Azərbaycana Yeni Məktəb” layihəsi çərçivəsində Azərbaycanın müxtəlif bölgələrində müasir təhsil infrastrukturu yaradılıb. Bu məktəblərdə övladlarımız yüksək səviyyəli təhsil alır və gələcəyimiz üçün savadlı nəsil yetişir. Bu proses artıq işğaldan azad edilmiş bölgələri də əhatə edir. Hesab edirəm ki, biz növbəti illərdə və yaxın perspektivdə — yeni məktəbəqədər təhsil müəssisələrinin, orta ixtisas və peşə təhsil mərkəzlərinin, ali təhsil müəssisələrinin filiallarının və yeni ali təhsil ocaqlarının bu bölgələrdə yaradılmasının şahidi olacağıq. Görülən işlər deməyə əsas verir ki, işğaldan azad edilmiş ərazilərimiz dünyanın ən gözəl, ən inkişaf etmiş və ən güclü təhsil sisteminə malik bölgələrindən birinə çevriləcək. Cənab Prezident, Müzəffər Ali Baş Komandan torpaqları şanlı ordumuzun gücü ilə işğaldan azad etdiyi kimi, həmin ərazilərdə yeni məktəblər, təhsil infrastrukturu və mədəni obyektlər quracaqdır. Bütün bu işlər Azərbaycan insanı, dövlətimizin gələcəyi və ölkəmizin daha da inkişaf etməsi, qüdrətlənməsi naminədir”.
Nəzrin Salmanova
18:06 02.06.2025
Oxunuş sayı: 1353
