Ankarada “Azərbaycan dilinin tədrisi ocağı”nın açılış mərasimi keçirilib
Azərbaycan mədəniyyət nazirinin müavini Səadət Yusifovanın rəhbərlik etdiyi nümayəndə heyəti Türkiyənin Ankara şəhərində səfərdədir.
Crossmedia.az-a Mədəniyyət Nazirliyindən verilən məlumata görə, səfər çərçivəsində nümayəndə heyəti mayın 30-da Azərbaycanın Türkiyədəki səfirliyinin nəzdindəki Azərbaycan Mədəniyyət Mərkəzi (AMM) ilə tanış olub.
AMM-in direktoru Samir Abbasov mərkəzin fəaliyyəti barədə ətraflı məlumat verib.
Nümayəndə heyəti AMM-in layihəsi ilə Türkiyənin Qazi Universitetində yaradılan “Azərbaycan dilinin tədrisi ocağı”nın və Azərbaycan dili kurslarının açılışında iştirak edib.
Əvvəlcə universitetin rektoru, professor Uğur Ünal ilə nümayəndə heyətinin görüşü olub. Söhbət zamanı universitetində yaradılan “Azərbaycan dilinin tədrisi ocağı”nın əhəmiyyəti vurğulanıb. Nazir müavini yaradılan şəraitə və dəstəyə görə rektora təşəkkür edib.
Daha sonra Azərbaycan dili kursunun açılışı olub. Rektor iki ölkə arasında qardaşlıq münasibətlərinin bütün sahələrdə əlaqələrin inkişafında özünü göstərdiyini deyib.
Öz növbəsində Səadət Yusifova tədris ocağının iki qardaş ölkə arasında mədəni əməkdaşlığın dərinləşməsinə xidmət edəcəyini bildirib.
Sonda Azərbaycan dili kursu dinləyicilərinin çıxışları təqdim olunub.
19:49 30.05.2025
Oxunuş sayı: 1217
