Obamanın evinin qarşısında insident: Gizli Xidmət əməkdaşları vəzifədən uzaqlaşdırıldı
ABŞ-də sabiq prezident Barak Obamanın evinin qarşısında dalaşan iki Gizli Xidmət əməkdaşı işdən müvəqqəti uzaqlaşdırılıb. Hadisə Gizli Xidmətin özündə də təsdiqlənib.
Crossmedia.az xəbər verir ki, ABŞ mediasının yaydığı xəbərlərə görə, prezidentləri və keçmiş prezidentləri qorumaqla məsul olan Gizli Xidmətin iki qadın əməkdaşı, keçmiş prezident Barak Obamanın Vaşinqtondakı evinin qarşısında mübahisə edərək fiziki qarşıdurmaya girib. “Fox News” telekanalının yayımladığı görüntülərdə uniforma geyinmiş əməkdaşların bir-birini təhdid etdiyi və itələdiyi əks olunub.
Hadisənin 21 may tarixində, yerli vaxtla gecə saat 02:30 radələrində baş verdiyi bildirilir. İnternetdə yayılan səs yazısında əməkdaşlardan birinin “Bu qıza gününü göstərmədən əvvəl bura təcili rəhbər gəlsin” sözlərini dediyi eşidilir. “RealClearPolitics” adlı platformada dərc olunan videoda isə qadın əməkdaşların bir-birinə vurduğu və qarşılıqlı itələdiyi aydın görünür. Qadınlardan biri, hadisə zamanı rabitə cihazı ilə dəstəyə çağırış edərək eyni sözləri təkrar edib.
Gizli Xidmətin sözçüsü məsələ ilə bağlı “Fox News Digital”a açıqlama verərək hadisəni təsdiqləyib. “Hadisədə iştirak edən əməkdaşlar vəzifədən uzaqlaşdırılıb, məsələ daxili araşdırmaya cəlb edilib. Təşkilatımızın bütün əməkdaşları üçün keçərli olan ciddi davranış qaydaları mövcuddur və bu qaydaların pozulması qəbuledilməzdir”, – deyə sözçü bildirib.
Hadisənin şəxsi xarakter daşıdığı və araşdırma başa çatana qədər əlavə açıqlama verilməyəcəyi bildirilib. Dalaşmanın dəqiq səbəbi isə hələlik açıqlanmayıb.
Mədinə Cəlilova
03:00 29.05.2025
Oxunuş sayı: 8500
