Yasamal rayonunda Zəfərin 6-cı ildönümünə həsr olunmuş idman yarışlarına start verilib
“Şəhərsalma və Memarlıq İli” çərçivəsində, Yeni Azərbaycan Partiyası Yasamal rayon təşkilatının, Yasamal Rayon İcra Hakimiyyətinin və Bakı Şəhər Gənclər və İdman İdarəsinin Yasamal rayonu üzrə Gənclər və İdman sektorunun birgə təşkilatçılığı ilə “Bakı-2026 – Dünya İdman Paytaxtı” tədbirlər proqramı çərçivəsində 44 günlük Vətən müharibəsində qazanılmış tarixi Zəfərin 6-cı ildönümünə həsr olunmuş, Yasamal rayonunda fəaliyyət göstərən orta ümumtəhsil məktəblərinin komandaları arasında idman yarışlarına start verilib.
Crossmedia.az xəbər verir ki, 15 oktyabr 2026-cı il tarixində Azərbaycan Dövlət Pedaqoji Universitetinin nəzdində fəaliyyət göstərən Azərbaycan Dövlət Pedaqoji Kollecində şahmat idman növü üzrə yarış keçirilib.
Tədbirdə Yeni Azərbaycan Partiyası Yasamal rayon təşkilatının sədri Bəxtiyar Nəbiyev, Bakı Şəhər Gənclər və İdman İdarəsinin Yasamal rayonu üzrə Gənclər və İdman sektorunun müdiri İlham Səfərov, Azərbaycan Dövlət Pedaqoji Kollecinin əməkdaşları və yarış iştirakçıları iştirak ediblər.
Əvvəlcə Ulu Öndər Heydər Əliyevin, eləcə də Azərbaycanın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. Daha sonra Azərbaycan Respublikasının Dövlət Himni səsləndirilib.
Çıxış edən YAP Yasamal rayon təşkilatının sədri Bəxtiyar Nəbiyev bu cür idman tədbirlərinin mühüm ictimai və mənəvi əhəmiyyət daşıdığını vurğulayıb. Qeyd olunub ki, bu təşəbbüs Azərbaycanın şanlı Zəfər tarixinin idman vasitəsilə təbliğinə, milli yaddaşın qorunmasına və gələcək nəsillərə ötürülməsinə xidmət edir. Natiq bildirib ki, bu cür yarışlar Vətən müharibəsində qazanılmış tarixi Qələbənin arxasında dayanan qəhrəmanlığı, fədakarlığı və xalqımızın sarsılmaz iradəsini bir daha ön plana çıxarır. Eyni zamanda, idman vasitəsilə sağlam rəqabətin təşviqi gənclərin fiziki hazırlığının, intellektual inkişafının və milli-mənəvi dəyərlərə bağlılığının gücləndirilməsinə mühüm töhfə verir. Bakı şəhərinin 2026-cı ildə Dünya İdman Paytaxtı kimi təmsil olunmasının Azərbaycanın beynəlxalq idman məkanındakı nüfuzunun və təşkilatçılıq potensialının nümayişi baxımından xüsusi əhəmiyyət daşıdığı diqqətə çatdırılıb. Həmçinin vurğulanıb ki, bu kimi təşəbbüslər idman və vətənpərvərlik ənənələrini bir araya gətirərək gənc nəsildə milli qürur, birlik və məsuliyyət hissini gücləndirir. Çıxışın sonunda Bəxtiyar Nəbiyev yarış iştirakçılarına uğurlar arzulayıb.
Daha sonra şahmat idman növü üzrə yarış keçirilib. Yarışın yekununda qalib komanda üzvlərinə müvafiq diplom və medallar təqdim olunub. Sonda xatirə şəkilləri çəkdirilib.
18:08 15.10.2026
Oxunuş sayı: 88
