Zelenskidən Berlində atəşkəs açıqlaması: “Daim səbəb axtarırlar”
Ukrayna Prezidenti Volodimir Zelenski Almaniyaya rəsmi səfəri çərçivəsində Almaniya Kansleri Fridrix Merslə birgə mətbuat konfransı keçirib.
Crossmedia.az xarici mediaya istinadən xəbər verir ki, Zelenski çıxışında, Mersin qısa müddət əvvəl Kiyevə etdiyi səfəri xatırladaraq bunu Ukraynaya verilən dəstək kimi qiymətləndirib.
Rus ordusunun Ukraynaya qarşı intensiv hava hücumlarını davam etdirdiyini bildirən Zelenski, müharibənin dayandırılması üçün Rusiyaya qarşı sanksiyaların artırılmasının vacib olduğunu vurğulayıb. O, bu istiqamətdə Almaniyanın da dəstək verdiyini qeyd edib və ABŞ Senatını da Rusiyaya qarşı sanksiya paketini təsdiqləməyə çağırıb. “Rusiya atəşkəsə getmir. Məncə, bu paketin qəbul olunmasının qarşısında heç bir maneə yoxdur”, – deyə Zelenski bildirib.
İyul ayında keçiriləcək NATO-nun Haaqa Zirvəsinə Ukraynanın qatılma ehtimalından danışan Zelenski, bu iştirakın onlar üçün böyük əhəmiyyət daşıdığını bildirib. Müttəfiqlərdən bu yöndə müəyyən siqnallar aldıqlarını deyən Zelenski, “Mənə görə, Ukrayna NATO Zirvəsinə qatılmazsa, bu, Putinin qələbəsi olacaq, lakin Ukraynaya qarşı yox, NATO-ya qarşı”, – deyə vurğulayıb.
Zelenski Rusiya tərəfindən Ukraynaya təqdim olunması üçün hazırlanmaqda olan atəşkəs memorandumu barədə də danışıb və bir həftədir bu sənədi gözlədiklərini deyib. Ukrayna Müdafiə naziri Rüstem Umerovun memorandumla bağlı Rusiya Prezidenti müşaviri Vladimir Medinski ilə telefon danışığı apardığını qeyd edən Zelenski, bu vaxta qədər Rusiyadan yalnız “köhnə ultimatumlar” eşitdiklərini bildirib. “Ukrayna hesab edir ki, atəşkəs üçün heç bir ilkin şərt olmamalıdır”, – deyə o bildirib.
Zelenski müharibənin dayandırılması üçün Rusiya ilə hər cür formatda danışıqlara hazır olduqlarını deyib. İstanbul, Cenevrə və ya Vatikanda görüşməyə açıq olduqlarını bildirən Ukrayna lideri, nəticə verəcək görüşlərin vacibliyini vurğulayıb. O əlavə edib: “Rusiya danışıqların harada keçiriləcəyi ilə bağlı daim yeni səbəblər axtarır. Savaşı bitirməmək üçün davamlı olaraq bəhanə tapacaqlar”.
Zelenski həmçinin Merslə ikitərəfli görüşdə iki ölkə arasında ortaq silah istehsalına dair müzakirələr apardıqlarını deyib. “Bu gün ölkələrimizin ortaq layihələrlə bağlı yeni razılaşmaları olmasından məmnunam. Ətraflı məlumat açıqlanmayacaq, amma Ukraynada istehsal sahəsinə, ilk növbədə silah, xüsusilə pilotsuz uçuş aparatlarının istehsalına dair investisiya razılaşmalarımız var”, – deyə o bildirib.
Zelenski əlavə edib ki, hava hücumundan müdafiə sistemləri sahəsində də Almaniya ilə əhəmiyyətli razılaşmaya nail olunub.
Mədinə Cəlilova
00:00 29.05.2025
Oxunuş sayı: 1140
