Almaniya Ukraynada “uzaqmənzilli” silahlar istehsal edəcək
Almaniya Müdafiə Nazirliyi Ukraynaya 5 milyard avro dəyərində əlavə yardım paketi təqdim edəcəyini açıqlayıb. Nazirlikdən verilən məlumata görə, Almaniya müdafiə naziri Boris Pistorius və ukraynalı həmkarı Rüstem Umerov arasında Berlində keçirilən görüşdə Ukraynaya konkret dəstək öhdəliyi verilib.
Crossmedia.az xəbər verir ki, açıqlamada Rusiyanın ağır hücumları nəticəsində çox sayda insanın həlak olduğu və xüsusilə mülki infrastrukturun ciddi ziyan gördüyü qeyd olunub. Bu kontekstdə Almaniyanın Ukraynaya hərbi dəstəyi davam etdirəcəyi bildirilib.
Nazirliyin açıqlamasına görə, görüş zamanı Ukraynada uzaqmənzilli silahların istehsalının maliyyələşdirilməsini nəzərdə tutan bir saziş imzalanıb. Almaniya bu razılaşma ilə gələcəkdə Ukrayna ərazisində birbaşa investisiya yolu ilə silah istehsalını həyata keçirməyi planlaşdırır. Bildirilir ki, bu il ərzində əhəmiyyətli sayda uzaqmənzilli silahın istehsalı mümkün olacaq və bu sistemlərin ilkin nümunələri bir neçə həftə ərzində Ukrayna ordusunun istifadəsinə veriləcək.
Bununla yanaşı, Almaniya Ukraynaya müxtəlif silah sistemləri üçün əlavə sursat paketləri də göndərəcək. Eyni zamanda, Ukrayna müdafiə naziri və Almaniyanın “Diehl” şirkəti hava hücumundan müdafiə sistemləri və əlaqəli sursatların tədarükü ilə bağlı müqavilə imzalayıblar.
Açıqlamada həmçinin Almaniyanın Ukraynada zədələnmiş hərbi obyektlərin bərpasını maliyyələşdirəcəyi və bu məqsədlə hər iki ölkənin müdafiə sənayesi şirkətlərinin ortaq layihələr üzrə razılığa gəldiyi qeyd olunub. Almaniyanın Ukraynada tibbi avadanlıqların istehsalını da dəstəkləyəcəyi vurğulanıb.
Mədinə Cəlilova
02:00 29.05.2025
Oxunuş sayı: 9036
