Yaponiya Fukuşimada radioaktiv torpağı çiçək əkini ilə sınaqdan keçirəcək
Yaponiya hökuməti Fukuşima atom elektrik stansiyası yaxınlığından çıxarılan zəif radioaktiv torpağın təhlükəsiz olduğunu sübut etmək üçün yeni bir planı həyata keçirməyə hazırlaşır. Bu məqsədlə həmin torpağın bir hissəsi Tokiodakı Baş nazir Şigeru İşibanın iqamətgahında yerləşən bağçaya daşınaraq çiçək əkinində istifadə olunacaq.
Bu qərar 2011-ci ildə baş verən zəlzələ və sunami nəticəsində baş verən və üç reaktorun əriməsi ilə nəticələnən qəzanın, Çernobıldan sonra dünyanın ən böyük nüvə fəlakətinin 14-cü ildönümündə elan edilib. Eksperiment üçün istifadə ediləcək torpaq, təhlükəli ərazilərin təmizlənməsi və yerli əhalinin geri qayıtması üçün aparılan işlər çərçivəsində çıxarılan 14 milyon kubmetrlik (təxminən 10 beysbol stadionunu dolduracaq qədər) materialın bir hissəsini təşkil edir.
Hökumət: “Aşağı risklidir”
Crossmedia.az xəbər verir ki, “The Guardian”qəzetinə görə, bu torpaq hazırda Fukuşima stansiyası yaxınlığında müvəqqəti saxlanılır. Lakin hökumət 2045-ci ilə qədər bu material üçün stansiyadan kənarda daimi saxlanma yerləri tapma öhdəliyini yerinə yetirməkdə çətinlik çəkir. Rəsmilər bildirir ki, aşağı riskli hesab edilən torpaq Yaponiya ərazisində yolların və digər infrastrukturun tikintisində istifadə oluna bilər. Təhlükəsizliyi təmin etmək üçün həmin material qalın üst torpaq qatı ilə örtüləcək.
Hökumət nümayəndələri, baş nazirin bağında aparılacaq bu sınağın, digər bölgələrdə də belə torpağın istifadəsinin nə əhalinin sağlamlığına, nə də ətraf mühitə risk yaratmayacağına dair ictimai inam yaradacağını düşünür.
Fukuşima Daiiçi AES, 11 mart 2011-ci ildə güclü zəlzələ və sunami nəticəsində zədələnmiş, bunun nəticəsində atmosferə böyük həcmdə radiasiya yayılmışdı. Fəlakətdən sonra minlərlə insan evakuasiya edilsə də, bir çox bölgə sakinləri geri dönmək istəmir. Bəziləri uşaqlar üçün potensial sağlamlıq risklərindən narahatdır, digərləri isə artıq başqa yerlərdə yeni həyat qurublar.
Bu arada, stansiyada hələ də təhlükəli nüvə yanacağının çıxarılması işləri davam edir. 880 tonluq zədələnmiş materialın reaktorların qoruyucu kapsullarından çıxarılması üzrə işlər yeni başlayıb. İndiyədək iki kiçik nümunə uğurla çıxarılsa da, bütövlükdə prosesi tamamlamaq üçün onilliklər tələb olunacağı gözlənilir.
Mədinə Cəlilova
23:15 28.05.2025
Oxunuş sayı: 5138
