Rusiya-ABŞ xəttində söz müharibəsi: “Trampın artıq Putin problemi var”
Dünya mediasında yer alan xəbərlərə görə, ABŞ Prezidenti Donald Trampın Rusiya lideri Vladimir Putinə qarşı sərt tonda səsləndirdiyi “odla oynayır” açıqlaması həm onun əhval-ruhiyyəsində, həm də Kremlə münasibətindəki dəyişikliyi əks etdirir.
Crossmedia.az xəbər verir ki, ABŞ və ərəb mediası Tramp və Putin arasında “sözlərin müharibəsi” başladığını qeyd edib. Qətər mərkəzli “Əl-Cəzirə” xəbər portalı, Rusiya Təhlükəsizlik Şurası sədrinin müavini və keçmiş prezident Dmitri Medvedevin Trampın sözlərinə sosial şəbəkədə verdiyi cavabına diqqət çəkib. Medvedev, Trampın “Putin odla oynayır” və “Rusiyanı həqiqətən pis şeylər gözləyir” fikirlərinə cavab olaraq X platformasında belə yazıb: “Mənim bildiyim yeganə həqiqətən pis şey Üçüncü Dünya Müharibəsidir. Ümid edirəm ki, Tramp bunu anlayır.”
Trampın Ukrayna üzrə xüsusi nümayəndəsi Kit Kellogg isə Medvedevin bu paylaşımına cavab olaraq, “Üçüncü dünya müharibəsi qorxularını qızışdırmaq məsuliyyətsiz və yersizdir bu, dünya gücünə yaraşmır”,- deyə bildirib.
ABŞ-nin “New York Post” qəzeti Tramp və Putinin fotoşəkilləri ilə birgə “Sözlərin müharibəsi” başlığı ilə xəbər dərc edib. “Politico” isə Trampın bu sərt tonda çıxışını, onun Kremlinə münasibətindəki açıq dəyişiklik kimi qiymətləndirib. Nəşrin yazdığına görə, Tramp bazar günü Putini “tamamilə dəli” adlandıraraq, əvvəlki mövqeyindən geri çəkildiyini göstərib.
“Politico” qeyd edib ki, Trampın bu dəyişikliyi Rusiyanın Ukraynaya gecə ərzində həyata keçirdiyi ən böyük hava hücumu nəticəsində 12 nəfərin həlak olmasından sonra baş verib. ABŞ-də bəzi çevrələr Trampı Putinə “qalxan olmaqda” ittiham edir. “The Independent” isə bildirib ki, Trampın Ukrayna müharibəsinə dair tənqidi açıqlamaları artsa da, son paylaşımı onun yenidən Putinə dəstək verdiyi kimi qiymətləndirilib.
Rusiya mediasında Trampın sözləri ilə bağlı yayımlanan xəbərlərdə, “Russia Today” onun açıqlamaları ilə istehza edərək, “Səhəri gün əksini paylaşana qədər açıqlamasının yanlış anlaşılma ehtimalı yox idi,” ifadəsinə yer verib.
Almaniyanın “Der Spiegel” jurnalında isə Roland Nelles Trampın artıq “Putin problemi” olduğunu yazıb. Onun fikrincə, Trampın Kremlə qarşı qəfil sərtləşməsi, daxili ictimai rəyə verdiyi önəmi göstərir. “Əgər Tramp Ukrayna məsələsində irəliləyiş əldə edə bilməzsə, daxildə zəif görünməkdən qorxur”, – deyə o qeyd edib.
Nelles əlavə edib ki, seçkidən əvvəl Tramp müharibəni 24 saatda bitirəcəyinə söz vermişdi, lakin hadisələrin bu istiqamətdə inkişaf etməməsi onun “böyük böhran lideri” imicinə zərər vura bilər. Yazıda həmçinin vurğulanır ki, Trampın Ukrayna ilə bağlı məsuliyyəti öz üzərindən atması yalnız qismən nəticə verə bilər. Avropalı liderlər və ABŞ Senatındakı həmkarları bu məsələdə Trampa təzyiq göstərməyə davam edirlər.
Nə baş vermişdi?
Donald Tramp Truth Social platformasında etdiyi paylaşımda, “Əgər mən olmasaydım, Rusiyanın başına çoxdan çox pis şeylər gəlmiş olardı. Putin odla oynayır!” sözləri ilə Rus liderinə xəbərdarlıq etmişdi. Tramp, həmçinin Rusiyanın Ukrayna ilə atəşkəsə nail olmaqda ləng hərəkət etdiyini, bunun isə onu narahat etdiyini bildirmişdi.
Mədinə Cəlilova
22:15 28.05.2025
Oxunuş sayı: 1025
