Avropa İttifaqı Suriyaya qarşı bəzi iqtisadi sanksiyaları ləğv edib
Avropa İttifaqı (Aİ) Şurası Suriyaya qarşı tətbiq olunan iqtisadi sanksiyaların bir qisminin ləğv edilməsi ilə bağlı yeni hüquqi tənzimləmələri qəbul edib.
Crossmedia.az xarici mediaya istinadən xəbər verir ki, qərara əsasən, təhlükəsizlik səbəbi ilə saxlanılan məhdudiyyətlər istisna olmaqla, Suriya iqtisadiyyatını hədəf alan sanksiyaların bir hissəsi aradan qaldırılıb.
Yeni qərarla 24 qurum sanksiya siyahısından çıxarılıb. Bunlara Suriya Mərkəzi Bankı, neft və qaz sektoru, pambıq sənayesi, telekommunikasiya və media sahələrində fəaliyyət göstərən şirkətlər daxildir.
Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas bu qərarı belə şərh edib:
“Bu tarixi anda atılan bu addım, Suriyanın bərpası və bütün suriyalıların arzularına uyğun siyasi keçidi dəstəkləmək məqsədi daşıyır. Aİ 14 ildir suriyalıların yanındadır və bu dəstək davam edəcək”.
Bununla yanaşı, Aİ bəyan edib ki, Suriya Prezidenti Bəşşar Əsədin rejiminə bağlı olan şəxslərə və qurumlara qarşı mövcud sanksiyalar 1 iyun 2026-cı ilədək uzadılıb.
18:34 28.05.2025
Oxunuş sayı: 7706
