Lavrovdan Azərbaycan və Ermənistana ilginc təklif: O əslində nə demək istəyib?
Rusiya xarici işlər naziri Sergey Lavrov Cənubi Qafqazdakı durum barədə danışıb. O, Azərbaycan və Ermənistana sülh prosesində uğurlar arzulayıb.
Nazir rəsmi Moskvanın bu prosesin irəlilədilməsində ölkələrə kömək etməyə hazır olduğunu deyib.
"Ermənistan və Azərbaycan arasında sülh sazişi imzalanmalıdır, biz onlara bu işdə səmimi olaraq uğurlar arzulayırıq. Aydındır ki, saziş Rusiya, Azərbaycan və Ermənistan arasında bir neçə üçtərəfli sammitin keçirilməsi sayəsində mümkün olub. Əgər hər iki tərəf maraqlıdırsa, biz bundan sonra da yardım göstərməyə hazırıq", - XİN başçısı vurğulayıb.
Məlum olduğu kimi, Azərbaycanla Ermənista arasında konflikt yarandığı gündən etibarən Moskva proseslərin içindədir. Kreml bu və ya digər formada münasibətlərin dinamikasında iştirakçı olmağa çalışır. Lavrovun bu dəfəki açıqlmasında ən diqqətçəkən məqam onun tərəflərə kömək təklif etməsidir. Maraqlıdır, kifayət qədər təcrübəli diplomat "kömək" deyəndə əslində nəyi nəzərdə tutur? Ümumiyyətlə, onun bu fikirlərinin arxasında dayanan nədir?
Bu mövzu ilə bağlı Crossmedia.az-a AMEA-nın elmi işçisi, siyasi şərhçi Vüsalə Gülmalıyeva açıqlama verib: "Lavrovun Azərbaycanla Ermənistan arasında sülh sazişinin imzalanması məsələsində Moskvanın kömək etməyə hazır olduğunu bildirməsi Rusiyanın Cənubi Qafqazda vasitəçilik rolunu qorumağa çalışdığını göstərir. Rusiya bu prosesə diplomatik təkliflər, təhlükəsizlik zəmanətləri və regiondakı təsir imkanları vasitəsilə dəstək verə bilər. 2020-ci ilin noyabrında imzalanan üçtərəfli bəyanat da göstərdi ki, Moskva bu cür razılaşmaların təşəbbüskarı və texniki təminatçısı kimi çıxış edə bilir. Sülh sazişinin hazırlanması, protokolların işlənməsi, nəqliyyat dəhlizlərinin açılması və sərhədlərin delimitasiyası kimi məsələlərdə də Rusiya müəyyən rol oynaya bilər. Lakin bu rol artıq əvvəlki illərdəki kimi qəti və təkbaşına deyil".
Siyasi şərhçi qeyd edib ki, bugünkü geosiyasi reallıqlar fonunda Moskvanın təsir imkanları zəifləyib: "Bunun əsas səbəblərindən biri Azərbaycanın 2020-ci ildən sonra əldə etdiyi strateji üstünlükdür. Prezident İlham Əliyevin rəhbərliyi ilə Azərbaycan müstəqil və balanslaşdırılmış xarici siyasət yürüdür. Bakı yalnız regional güclərlə deyil, həm də qlobal aktorlarla eyni səviyyədə əlaqələr qurur, diplomatik manevr imkanlarını genişləndirir. İlham Əliyev heç bir xarici gücün diktəsi ilə hərəkət etmir və bu, Azərbaycanın suverenliyə əsaslanan azad siyasətinin bariz nümunəsidir. O, Rusiya ilə münasibətləri praqmatik səviyyədə saxlayır, eyni zamanda Avropa İttifaqı, Türkiyə və Çinlə strateji tərəfdaşlıq qurur, ABŞ-lə da münasibətləri pozmadan balanslı siyasət yürüdür".
V. Gülmalıyeva bildirib ki, Ermənistan isə eyni zamanda həm Rusiyaya qarşı etimadsızlıq, həm də Qərbə inteqrasiya cəhdləri içindədir: "Bu isə Moskvanın vasitəçilik missiyasını daha da çətinləşdirir. Digər tərəfdən, Avropa İttifaqı və ABŞ tərəfindən irəli sürülən Brüssel və Vaşinqton platformaları sülh prosesində alternativ istiqamətlərin formalaşmasına səbəb olub. Bu kontekstdə İlham Əliyevin yürütdüyü azad və milli maraqlara əsaslanan siyasət Azərbaycanın həm Rusiya, həm Qərb, həm də region ölkələri ilə bərabərhüquqlu münasibətlər qurmasına şərait yaradır. Bu siyasət nəticəsində Azərbaycan yalnız sülh sazişi prosesində deyil, bütövlükdə regionun gələcək təhlükəsizlik və inkişaf gündəmində həlledici aktora çevrilib".
Xumar Emilqızı
15:45 23.05.2025
Oxunuş sayı: 29033
