Netanyahu: Qəzzadakı humanitar vəziyyət İsrailin beynəlxalq dəstəyini riskə atır
İsrailin Baş naziri Benyamin Netanyahu son çıxışında bildirib ki, uzun illər ərzində İsrailin ən yaxın tərəfdaşları kimi tanıdığı ABŞ Senatının bəzi üzvləri hazırda Qəzza zolağında yaşanan humanitar vəziyyətlə bağlı ciddi narahatlıqlar ifadə edirlər.
Crossmedia.az-ın xarici mediaya istinadən verdiyi məlumata görə, Netanyahu qeyd edib ki, bu senatorlar Qəzzada aclıq və ümidsizlik səhnələrinin ABŞ-nin İsrailə strateji dəstəyinə mənfi təsir etdiyini və vəziyyətin nəzarətdən çıxma nöqtəsinə yaxınlaşdığını düşünürlər.
“Bu səbəbdən biz qələbəyə nail olmaq üçün bu məsələnin həllinə də xüsusi diqqət yetirməliyik,” – deyə baş nazir qeyd edib. Onun bu sözləri, müşahidəçilərin fikrincə, İsrail hökumətində yer alan və Qəzzaya humanitar yardımın qarşısının alınmasını istəyən bəzi radikal dairələrə ünvanlanıb.
Onu da qeyd edək ki, ötən həftə ABŞ Senatında 29 demokrat senator tərəfindən təqdim olunan qətnamədə Qəzzaya tətbiq olunan blokadanın aradan qaldırılması və humanitar yardımın təmin olunması üçün ABŞ administrasiyasına “bütün diplomatik alətlərdən istifadə” çağırışı edilmişdir.
Hazırda beynəlxalq ictimaiyyət bölgədə humanitar böhranın dərinləşməsinin qarşısını almaq üçün aktiv diplomatik səylərini davam etdirir.
Nigar Yahyazadə
10:55 20.05.2025
Oxunuş sayı: 9016
