Qətərdə gedən danışıqlarda atəşkəslə bağlı irəliləyiş yoxdur
Qətərdə İsrail və HƏMAS nümayəndələri arasında davam edən atəşkəs danışıqları hazırda nəticəsiz qalır. Beynəlxalq vasitəçilərin iştirakı ilə aparılan müzakirələrdə tərəflər arasında bir sıra mühüm fikir ayrılıqları qalmaqdadır.
Crossmedia.az-ın xarici mediaya istinadən verdiyi məlumata görə, İsrail tərəfi danışıqlarda yalnız bir hissə girovların azad olunması qarşılığında müvəqqəti razılaşmanı təklif edir və müharibənin tam dayandırılması ilə bağlı öhdəlik götürməkdən imtina edir.
HƏMAS-ın yüksək vəzifəli nümayəndəsi adının açıqlanmasını istəməyərək bildirib ki, təşkilat yalnız daimi atəşkəsin təmin olunması, İsrail ordusunun Qəzza zolağından tam çıxarılması və daha çox fələstinli məhbusun azad olunması şərtilə qalan israilli girovların sərbəst buraxılmasına razılıq verəcək.
İsrailin Baş naziri Benyamin Netanyahu isə xalqa video müraciətində ölkəsinin “tam qələbə”yə nail olacağını vurğulayıb. O, HƏMAS tərəfindən əsir götürülmüş 58 israilli girovun azad ediləcəyini və təşkilatın tamamilə məhv olunacağını bəyan edib.
Hazırda danışıqların uğurla nəticələnməsi üçün beynəlxalq ictimaiyyət səylərini davam etdirir. Tərəflər arasında sülhün bərqərar olunması isə bölgədə uzunmüddətli sabitliyin təmin olunması baxımından mühüm əhəmiyyət kəsb edir.
Nigar Yahyazadə
10:50 20.05.2025
Oxunuş sayı: 825
