İran uranı zənginləşdirməyə davam edəcəyini bəyan edib
İran və ABŞ arasında nüvə proqramı ilə bağlı gərginlik yenidən gündəmə gəlib.
Crossmedia.az xarici mediaya istinadən xəbər verir ki, İranın xarici işlər nazirinin siyasi məsələlər üzrə müavini Məcid Təxtrəvançi bildirib ki, ölkəsi uranın zənginləşdirilməsi prosesindən geri çəkilmək niyyətində deyil.
Onun sözlərinə görə, bu fəaliyyət İranın milli nailiyyətidir və uzun illərdir davam etdirilir.
“Zənginləşdirmə ilə bağlı mövqeyimiz aydındır və biz dəfələrlə bildirmişik ki, zənginləşdirmə bizim üçün milli nailiyyətdir, bizim öz alimlərimizin əldə etdiyi və illərdir davam etdirdiyi nailiyyətdir”, - deyə Təxtrəvançi vurğulayıb.
O, ABŞ-nin İranla danışıqlardakı nümayəndəsi Stiv Uitkofun “ABC” telekanalına verdiyi açıqlamaya da münasibət bildirib.
Xatırladaq ki, Uitkof həmin müsahibədə demişdi: “Bizim çox aydın qırmızı xəttimiz var və bu, İranın uranı zənginləşdirməsidir. Biz zənginləşdirmə imkanlarının bir faizini belə qəbul etməyəcəyik”.
Qeyd edək ki, tərəflər arasında nüvə proqramı ilə bağlı danışıqlar son aylarda yenidən intensivləşsə də, fikir ayrılıqları prosesin dalana dirənməsinə səbəb olub.
Aybəniz Səfərova
21:44 19.05.2025
Oxunuş sayı: 9297
