Amazon “toxunma hissinə” malik anbar robotunu istifadəyə verdi
Texnologiya nəhəngi Amazon, anbarlarda istifadə üçün “Vulcan” adlı yeni robotunu təqdim edib. Şirkətin verdiyi məlumata görə, Vulcan toxunduğu bəzi əşyaları “hiss etmə” qabiliyyətinə malikdir və bu xüsusiyyət onun məhsullarla daha səmərəli şəkildə işləməsinə imkan yaradır.
Crossmedia.az xarici mediaya istinadən xəbər verir ki, iki qollu Vulcan robotu, Amazonun anbarlarında yerləşən saxlama bölmələrində məhsulları idarə etmək üçün nəzərdə tutulub. Güc sensorları vasitəsilə obyektlə təmas anını müəyyən edə bilən robotun bir qolu məhsulları düzür, digər qolu isə kamera və sorucu başlıqla təchiz olunaraq məhsulları tutur.
Amazon bildirir ki, Vulcan güc və toxunma məlumatları əsasında təlim alıb və bu bacarığı sayəsində şirkətin məhsul ehtiyatının təxminən 75 faizini tanıya və seçə bilir. Şirkət həmçinin qeyd edir ki, Vulcan zaman keçdikcə özünü təkmilləşdirmək qabiliyyətinə də sahibdir.
Hazırda Vulcan robotu ABŞ-nin Spokane (Vaşinqton) və Almaniyanın Hamburq şəhərlərində fəaliyyət göstərir. Amazonun məlumatına görə, bu robot indiyə qədər yarım milyondan çox sifarişi emal edib.
Zeynəb Yunuszadə
22:43 19.05.2025
Oxunuş sayı: 7797
