Kolumbiyanın aparıcı universitetində Azərbaycanla bağlı təqdimat olub
Kolumbiyanın ən nüfuzlu ali təhsil müəssisələrindən biri olan Xaveriana Universitetində ölkəmizlə bağlı geniş təqdimat keçirilib. “Diplomatlarla dialoq” təşəbbüsü çərçivəsində baş tutan tədbirdə Xaveriana Universitetinin müxtəlif fakültələrində təhsil alan tələbələr iştirak ediblər.
Crossmedia.az xəbər verir ki, tədbir zamanı Şərqdə ilk demokratik və dünyəvi dövlət olan Azərbaycan Xalq Cümhuriyyətinin ölkəmizin dövlətçilik tarixində oynadığı əhəmiyyətli rola nəzər salınıb, qısa zaman kəsiyində əldə olunan mütərəqqi nailiyyətlər və islahatlar barədə məlumat verilib. Ölkəmizin 1991-ci ildə müstəqilliyini bərpa etdikdən sonra çox ciddi siyasi-iqtisadi təhdidlərlə üzləşməsinə baxmayaraq, müstəqil Azərbaycanın qurucusu Ümummilli Lider Heydər Əliyevin uzaqgörən və müdrik siyasəti nəticəsində sürətli inkişaf yoluna qədəm qoyduğu, beynəlxalq arenada güclü və nüfuzlu dövlət kimi tanındığı diqqətə çatdırılıb. Dünyada cərəyan edən geosiyasi proseslər kontekstində Azərbaycanın beynəlxalq enerji sistemində artan əhəmiyyətli roluna, iqtisadi, tranzit-logistik uğurlarına toxunulub.
Bununla yanaşı, Ermənistan tərəfindən uzun illər həyata keçirilən işğalçılıq siyasətinin və mina terrorunun ağır nəticələri, Azərbaycanın mədəni və dini irsinin məhvi, həmçinin ölkəmizin işğaldan azad edilmiş ərazilərdə gördüyü genişmiqyaslı bərpa-quruculuq işləri barədə ətraflı məlumat təqdim olunub.
Eyni zamanda, ölkəmizdəki multikultural mühitdən söz açılıb, Azərbaycanın multikultiralizm modelinin mütərəqqi nümunə kimi dünya miqyasında yüksək qiymətləndirildiyi, bu uğurun cəmiyyətdə formalaşmış dözümlülük, tolerant və multikultiral ənənələrlə yanaşı, düşünülmüş dövlət siyasətinin nəticəsi olduğu vurğulanıb.
Sonda Azərbaycanda təklif olunan əlverişli təhsil və təqaüd imkanları, xüsusilə “Heydər Əliyev adına Beynəlxalq Təhsil Qrantı”nın üstünlükləri barədə məlumat verilib, tədbir iştirakçılarını maraqlandıran suallar cavablandırılıb.
13:50 14.05.2025
Oxunuş sayı: 9762
