Keçmiş deputat Zelenskiyə Konstitusiyanı oxumağı tövsiyə edib
Ukraynanın keçmiş deputatı Vladimir Oleynik Prezident Volodimir Zelenskini Kiyevin enerji infrastrukturuna mümkün hücumlara hazırlıqla bağlı məsuliyyəti şəhər meri Vitali Kliçkonun üzərinə atmağa çalışmaqda ittiham edib.
Crossmedia.az xəbər verir ki, Oleynik “Lenta.ru”ya açıqlamasında Zelenskiyə Ukrayna Konstitusiyasını oxumağı tövsiyə edib.
O bildirib ki, Kiyevin müdafiəyə və enerji böhranına hazırlığına görə həm prezident, həm də şəhər rəhbərliyi məsuliyyət daşıyır. Oleynikin sözlərinə görə, Ukraynanın paytaxtı xüsusi diqqət tələb edir və bu məsələdə hökumətlə şəhər rəhbərliyinin əlaqəli fəaliyyəti vacibdir.
Keçmiş deputat qeyd edib ki, Zelenski ilə Kliçko arasında münasibətlər konstruktiv deyil. Onun iddiasına görə, prezidentlə mer uzun müddət görüşməyib və yalnız ötən qışın nəticələri ilə bağlı yazda bir araya gəliblər.
Oleynik əlavə edib ki, Zelenski konstitusion məhdudiyyətlər səbəbindən Kliçkonu vəzifədən uzaqlaşdıra bilməz. O, həmçinin Kiyev merinin Almaniyada dəstək qazandığını iddia edib.
Keçmiş deputatın sözlərinə görə, Kiyevin enerji infrastrukturuna hazırlığı məsələsi hələ yazda Təhlükəsizlik Şurasında müzakirə olunub və həmin vaxt Kliçko əlavə resurslara ehtiyac olduğunu bildirib. Oleynik Zelenskinin bu müraciətləri nəzərə almadığını iddia edib.
Qeyd edək ki, bundan əvvəl Zelenski Rusiyanın enerji obyektlərinə kütləvi zərbələri fonunda Kiyevin hazırlığını tənqid edərək Kliçkonu lazımi tədbirləri görməməkdə ittiham etmişdi. Kliçko isə daha əvvəl paytaxt sakinlərinə müraciət edərək infrastruktur problemləri şəraitində vəziyyətin ciddi olduğunu bildirmişdi.
19:16 09.10.2026
Oxunuş sayı: 60
