Azərbaycan mühüm görüşə ev sahibliyi edə bilər- Proqnoz
İran Azərbaycan və Ermənistan arasında sülh mətni layihəsinin razılaşdırılmasını alqışlayır.
İranın xarici işlər nazirinin müavini, Xarici İşlər Nazirliyinin Siyasi və Beynəlxalq Araşdırmalar Mərkəzinin rəhbəri Səid Xətibzadə Bakıda Beynəlxalq Münasibətlərin Təhlili Mərkəzində (BMTM) keçirilən tədbirdə deyib ki, İran Pezidenti Azərbaycanla Ermənistan arasında sülh sazişinin imzalanmasında vasitəçilik edə bilər:
"İnanıram ki, hər iki ölkənin gündəlik əlaqələrində bu məsələ də öz əksini tapacaq".
Rəsmi Tehranın bu bəyanatı qulağa xoş gəlsə də, qarşı tərəfin nə qədər səmimi olduğu sual altındadır. Çünki Azərbaycanın İranın sözləri ilə əməllləri arasındakı ziddiyətin dəfələrlə şahidi olub.
Bu barədə Crossmedia.az-a danışan siyasi şərhçi, Orta Doğu Araşdırmalar Mərkəzinin sədri Sədrəddin Soltan bildirib ki, Azərbaycan-İran münasibətlərin normallaşması və bərpası üçün Prezident İlham Əliyev ADA universitetindəki çıxışında rəsmi Bakının mövqeyini aydın ifadə edib: “Əsas məsələ Azərbaycanın İrandakı səfirliyinə hücumu icra edən və həmin hadisənin arxasında duran şəxsin cəzalandırılmasıdır. Həmçinin Tehran Ermənistanın Azərbaycana qarşı silahlandırılmasından imtina etməsi lazımdır. İran öz ərazisində Azərbaycana qarşı olan qüvvələrin fəaliyyətini dayandırması vacibdir. Zəngəzur yolu ilə bağlı İran hakimiyyətinin mövqeyinin yumşalması da əsas məqamdır. ".
Müsahibimiz qeyd edib ki, İranı Azərbaycanın daxili işlərinə qarışmaqdan imtina etməlidir: "Azərbaycan həm İsraillə, həm də ABŞ və İranla münasibətdə olan, danışıqlar apara bilən ölkədir. Regionda Azərbaycandan başqa belə bir mövqeyə malik ölkə yoxdur. Ona görə perspektivdə Bakının bu mövqeyindən yararlana bilərlər. Azərbaycan bu ölkələrinin münasibətlərinin normallaşmasında vasitəçilik edə bilər. Azərbaycan bu ölkələrin görüşünün keçirilməsinə ev sahibliyi edə bilər".
Fatimə Məmmədova
21:05 06.05.2025
Oxunuş sayı: 14645
