Türkiyə F-16-ları Suriyada İsrail qırıcılarını izləyib – qarşılıqlı xəbərdarlıq siqnalları göndərilib
Suriya hava məkanında gərginlik yaşanıb. Yerli və xarici mətbuatda yayılan məlumatlara görə, bu həftə Dəməşqdə yerləşən prezident sarayı yaxınlığına həyata keçirilən İsrail hava hücumu zamanı Türkiyə Hərbi Hava Qüvvələrinə məxsus F-16 qırıcıları da bölgədə aktiv olub.
Crossmedia.az xarici mediaya istinadən bildirir ki, Türkiyə qırıcıları İsrail Hava Qüvvələrinin fəaliyyət göstərdiyi əraziyə daxil olaraq kəşfiyyat uçuşları həyata keçirib. Onların əsas məqsədi bölgədəki hərbi vəziyyəti qiymətləndirmək və ehtiyac yaranarsa, cavab tədbiri görmək olub.
Verilən məlumatlara əsasən, Türkiyə F-16-ları İsrail təyyarələrinə qarşı radioelektron mübarizə sistemləri vasitəsilə xəbərdarlıq siqnalları göndərib. Hər iki tərəfin ekipajları arasında qısa müddətli radiobağlantı da baş tutub. Bu ünsiyyətin qarşılıqlı toqquşmanın qarşısını aldığı qeyd olunur.
Hadisə bölgəsində İsrailin hərbi fəaliyyəti fonunda Türkiyənin atdığı bu addım ekspertlər tərəfindən diqqətlə izlənilir. Analitiklər bunu Ankara ilə Təl-Əviv arasında mövcud olan gərgin münasibətlərin yeni mərhələyə keçidi kimi qiymətləndirirlər. Belə bir vəziyyətin gələcək diplomatik münasibətlərə təsiri də müzakirə mövzusudur.
Qeyd edək ki, məsələ ilə bağlı nə Türkiyədən, nə də İsraildən rəsmi açıqlama verilməyib. Hazırda hər iki tərəfin rəsmi mövqeyi gözlənilir.
Fatimə Nəbiyeva
21:07 04.05.2025
Oxunuş sayı: 8631
