Livan: "Həmas İsrailə atılan raketlərlə bağlı şübhəlini təhvil verdi"
Livan ordusu, mart ayında ölkənin cənubundan İsrailə atılan raketlərlə bağlı şübhəli bilinən bir şəxsin Həmas tərəfindən təhvil verildiyini açıqlayıb.
Crossmedia.az ordu tərəfindən yayılan bəyanata istinadən xəbər verir ki, 22–28 mart tarixləri arasında Livanın cənubundan İsrail istiqamətinə atılan raketlərlə əlaqədar aparılan araşdırmalar nəticəsində bir şübhəlinin Həmas tərəfindən Livan ordusuna təhvil verildiyi bildirilib.
Açıqlamada, Livan hökuməti və Ali Müdafiə Şurasının ölkənin milli təhlükəsizliyi və sabitliyini pozacaq hərəkətlərə imkan verilməməsi ilə bağlı xəbərdarlıqlarına diqqət çəkilib. Eyni zamanda, ölkənin suverenliyini poza biləcək potensial hərəkətlərin qarşısının alınması məqsədilə təhlükəsizlik tədbirlərinin gücləndirildiyi vurğulanıb.
Ordu rəhbərliyinin apardığı intensiv təmaslar nəticəsində Həmasın adıçəkilən şübhəlini Sayda şəhərində yerləşən Ayn əl-Hilvə qaçqın düşərgəsinin girişində Livan ordusuna təhvil verdiyi bildirilib. Təhvil verilən şəxsin, 22–28 mart tarixləri arasında cənubdan İsrailə atılan raketlərin əsas şübhəlisi olduğu qeyd olunub. Onun barəsində istintaqın davam etdiyi açıqlanıb.
Livan hökuməti daha öncə Həmas və digər Fələstinli qruplara müraciət edərək, ölkənin milli təhlükəsizliyini və sabitliyini pozmamağa çağırmışdı. Livan ordusu həmçinin bir neçə gün əvvəl həmin dövrdə baş verən raket hücumları ilə əlaqədar bəzi Livanlı və Fələstinli şəxsləri saxladıqlarını açıqlamışdı.
22 martda İsrail, Livanın cənubundan atılan raketləri əsas gətirərək ölkənin şərq və cənub bölgələrinə iki gün ərzində intensiv hava hücumları təşkil etmişdi. 28 martda isə İsrail ordusu Livanın cənubundan şimalına doğru yenidən raket atıldığını bildirərək, cavab olaraq cənub bölgəsini və paytaxt Beyrutu hava zərbələri ilə hədəf almışdı.
Bu hava hücumları, 27 noyabr 2024-cü ildə qüvvəyə minən atəşkəsdən sonra Beyrutu hədəf alan ilk bombardman olmuşdu.
Mədinə Cəlilova
18:04 04.05.2025
Oxunuş sayı: 6323
