Hindistan Pakistanla sərhəddə Çenab çayının axınını dayandırdı
Hindistan hökuməti Pakistanla sərhəddə yerləşən Çenab çayının axınını kəsib. Məlumata görə, Hindistan hökuməti növbəti addım kimi Chelam çayının da qarşısını almağı planlaşdırır. Bu çaylar hər iki ölkənin istifadə etdiyi İnd çay sisteminə daxildir.
Crossmedia.az xarici mediaya istinadən bildirir ki, Hindistan mediası hadisəni təsdiqləyib və bunun arxasında İnd çay sistemi üzrə bağlanmış müqavilənin ləğvinin dayandığını bildirib. Xatırladaq ki, Hindistan bir müddət əvvəl Pakistanla su ehtiyatlarının bölüşdürülməsini tənzimləyən İnd çay sistemi haqqında müqaviləni birtərəfli qaydada ləğv etmişdi.
Pakistan hökuməti Hindistanın bu addımını ciddi təhdid kimi qəbul edir. Ölkənin Milli Təhlükəsizlik Komitəsi Hindistanın su axınının qarşısını almağa çalışacağı təqdirdə, bunu “müharibə aktı” kimi qiymətləndirəcəklərini bəyan edib. Rəsmi İslamabad bu məsələ ilə bağlı beynəlxalq ictimaiyyəti məlumatlandırmağa hazırlaşır.
Ekspertlərin fikrincə, bu kimi su münaqişələri regionda gərginliyi daha da artırır və iki nüvə silahlı dövlət arasında qarşıdurma riskini yüksəldir. Su ehtiyatlarının siyasi vasitəyə çevrilməsi Cənubi Asiyada onsuz da kövrək olan sabitliyi təhlükə altına ala bilər.
Xatırladaq ki, İnd çay sistemi 1960-cı ildə imzalanmış müqavilə ilə tənzimlənirdi və hər iki ölkəyə çaylardan müəyyən qaydada istifadə hüququ verilirdi. Bu müqavilənin pozulması bölgədə ciddi humanitar və kənd təsərrüfatı problemlərinə səbəb ola bilər.
Fatimə Nəbiyeva
16:12 04.05.2025
Oxunuş sayı: 856
