Türkiyə Türkmən qazını Xəzər dənizi üzərindən nəql etməyi hədəfləyir
Türkiyə Prezidenti Rəcəb Tayyib Ərdoğan Türkmənistan qazının Türkiyəyə birbaşa nəqlini hədəflədiklərini bildirib. O, bu məqsədlə Xəzər dənizinin altından keçəcək boru kəməri layihəsinin gündəmdə olduğunu vurğulayıb. Bu barədə Türkiyə lideri İstanbulda keçirilən Təbii Ehtiyatlar Sammitində çıxışı zamanı danışıb.
Crossmedia.az xarici mediaya istinadən bildirir ki, Prezident Ərdoğan mart ayından etibarən Türkmən qazının artıq Türkiyəyə İran ərazisindən keçməklə nəql edilməyə başladığını bildirib. O qeyd edib ki, bu marşrut vasitəsilə indiyədək 250 milyon kubmetr qaz Türkiyəyə çatdırılıb. Bu rəqəmin ilin sonuna qədər 1,3 milyard kubmetrə çatacağı gözlənilir.
Ərdoğan həmçinin qeyd edib ki, enerji sahəsində əməkdaşlıq bölgədəki sabitlik və iqtisadi inkişaf baxımından xüsusi əhəmiyyət daşıyır. Onun sözlərinə görə, Ankaranın hədəfi yalnız qaz idxalını artırmaq deyil, eyni zamanda region ölkələri ilə enerji sahəsində daha dərin inteqrasiyaya nail olmaqdır.
Türkiyə prezidenti Xəzər dənizi vasitəsilə Türkmən qazının birbaşa Türkiyəyə nəqli üçün uzunmüddətli layihələrin zəruriliyinə də diqqət çəkib. O, bu istiqamətdə beynəlxalq əməkdaşlıq və regional razılaşmaların vacibliyini vurğulayıb. Bu layihənin həyata keçməsi həm Türkmənistan, həm də Avropa bazarı üçün alternativ enerji marşrutu yaradacaq.
Qeyd edək ki, Türkmənistan dünyanın ən böyük qaz ehtiyatlarına sahib ölkələrindən biridir. Bu ölkənin qazının Türkiyə vasitəsilə Avropaya nəqli isə həm enerji təhlükəsizliyi, həm də siyasi sabitlik baxımından strateji əhəmiyyət kəsb edir.
Fatimə Nəbiyeva
15:15 04.05.2025
Oxunuş sayı: 8824
