Husilərdən İsrailin Ben Qurion Hava limanına raket hücumu
İsrail ordusu, Yəməndən atılan və qarşısı alına bilməyən bir raketin Təl-Əvivdəki Ben Qurion Hava Limanına düşdüyünü bildirib. Raket hücumu səbəbilə Təl-Əviv və İsrailin daxili bölgələrində hava hücumu siqnalları səsləndirilib.
İsrail Müdafiə Qüvvələrinin (IDF) ilkin qiymətləndirməsinə görə, Yəməndən atılan raketin qarşısı alınmağa çalışılsa da, bu cəhd uğursuz olub və raket Ben Qurion Hava Limanı ərazisinə düşüb. Hadisədən sonra hava limanında uçuşlar müvəqqəti olaraq dayandırılıb.
Crossmedia.az İsrailin “Haaretz” qəzetinin verdiyi məlumata istinadən xəbər verir ki, Husi hərəkatının yüksək rütbəli nümayəndələrindən Məhəmməd əl-Bəhiti, Qətər mərkəzli “Əl Arabi” kanalına verdiyi açıqlamada Ben Qurion Hava Limanına edilən hücumun İsraildəki gücləndirilmiş hədəfləri vurmaq qabiliyyətlərini göstərdiyini deyib. Husi sözçüsü Yəhya Səri də hücumu üzərinə götürərək hava limanının artıq “təhlükəsiz bir uçuş nöqtəsi olmadığını” bəyan edib.
İsrailin müdafiə naziri İsrael Kats isə açıqlamasında, “Bizi vuran hər kimdirsə, onu yeddi qat daha çox vuracağıq”, – deyə xəbərdarlıq edib.
İsrail ordusunun ilkin açıqlamasında, Yəməndən İsrail istiqamətində atılan bir raketi zərərsizləşdirməyə çalışdıqları, lakin nəticələrin hələ qiymətləndirildiyi bildirilib. Daha sonra yayılan məlumatda, raketin Təl-Əvivdəki Ben Qurion Hava Limanına düşdüyü ehtimalının gücləndiyi qeyd edilib.
Haaretz qəzetinin məlumatına görə, raketin parçaları hava limanı yaxınlığına düşüb və bu səbəbdən uçuşlar bir müddət təxirə salınıb. İsrailin dövlət televiziyası KAN da hava limanının hücuma məruz qaldığını, bu səbəblə eniş və qalxışlara bağlandığını təsdiqləyib. Uçuşlar təxminən bir saat dayandırıldıqdan sonra bərpa edilib.
Hadisədən sonra əraziyə yanğınsöndürənlər cəlb edilib və hava limanında baş verən partlayış nəticəsində bir neçə nəfərin yüngül yaralandığı bildirilib. Haaretz qəzetinin son məlumatında isə hadisə nəticəsində dörd nəfərin öldüyü qeyd olunub.
İsrail polisi əhalidən Ben Qurion Hava Limanına yaxınlaşmamalarını istəyib. Rəsmi qurumlar hava limanına Yəməndən atılan raketin düşdüyünü təsdiqləyib və hadisə ilə bağlı araşdırmaların davam etdiyini açıqlayıb.
Yəməndəki Husi hərəkatı, Qəzza zolağına qarşı hücumlarını yenidən artıran İsraili vaxtaşırı ballistik raket və pilotsuz uçuş aparatları ilə hədəfə alır.
Mədinə Cəlilova
14:17 04.05.2025
Oxunuş sayı: 1126
