Kəşmirdə gərginlik: Hindistan və Pakistan orduları arasında atışma baş verib
Hindistan və Pakistan arasında mübahisəli Kəşmir bölgəsində yenidən gərginlik yaşanıb. Hindistan ordusu LoC (Nəzarət Xətti) boyunca yerləşən Lipa vadisi istiqamətində Pakistan ərazisinə atəş açıb. Hadisə nəticəsində bölgədə qarşılıqlı silahlı toqquşma qeydə alınıb.
Crossmedia.az xarici mediaya istinadən bildirir ki, Hindistanın atəşinə cavab olaraq Pakistan Silahlı Qüvvələri güclü cavab tədbiri həyata keçirib. Pakistan tərəfi Hindistan mövqelərinə qarşı ağır silahlardan istifadə etməklə cavab atəşi açıb. Toqquşma eyni bölgədə — Lipa vadisində baş verib və hər iki tərəf bir-birini atəşkəsi pozmaqda ittiham edir.
Pakistan Ordusunun verdiyi açıqlamada qeyd olunub ki, Hindistanın təxribat xarakterli hücumlarına qarşı cavab mütənasib olub və bölgədəki mülki əhalinin təhlükəsizliyini təmin etməyə yönəlib. Hindistan tərəfi isə baş verənlərlə bağlı hələlik rəsmi açıqlama yaymayıb.
Lipa vadisi uzun illərdir Hindistan və Pakistan arasında mübahisəli Kəşmir bölgəsində gərginliyin ən çox yaşandığı ərazilərdən biridir. Bu kimi atışmalar bölgədə həm hərbi, həm də mülki itkilərə səbəb olur və tərəflər arasında sülh danışıqlarını daha da çətinləşdirir.
Xatırladaq ki, Hindistan və Pakistan arasında Kəşmir problemi 1947-ci ildən bəri davam edir. Hər iki ölkə bölgəyə iddia edir və zaman-zaman Nəzarət Xətti boyunca bu cür silahlı qarşıdurmalar baş verir. Beynəlxalq ictimaiyyət tərəfləri təmkinli olmağa və dialoq yolu ilə problemi həll etməyə çağırır.
Fatimə Nəbiyeva
12:00 04.05.2025
Oxunuş sayı: 9650
