Rusiya 9 May tədbirlərini pozmamaq üçün Ukrayna ilə əlaqə saxlayıb – KİV
Rusiya hakimiyyət nümayəndələri 9 May – Qələbə Günü münasibətilə planlaşdırılan bayram tədbirlərini pozmamaq məqsədilə Ukrayna rəhbərliyi ilə “quraşdırılmış rabitə kanalları” vasitəsilə əlaqə saxlayıblar. Bu barədə Rusiya KİV-i məlumat yayıb.
Crossmedia.az xəbər verir ki, 2023 və 2024-cü illərdə olduğu kimi, Kreml mühüm hadisələrlə bağlı özəl kommunikasiya kanalları vasitəsilə Ukrayna ilə danışıqlar aparır və indiyədək əldə olunan razılaşmalara əməl olunub.
Xəbərdə qeyd olunur ki, Rusiya prezidenti Vladimir Putin dünən Birləşmiş Ərəb Əmirliklərinin prezidenti Məhəmməd bin Zayed Əl Nəhyanla telefon danışığı zamanı ondan Ukrayna tərəfi ilə “quraşdırılmış əlaqə” çərçivəsində danışıqlar aparmağı xahiş edib.
Mayın 9-da Moskvada keçiriləcək tədbirlərə Çin prezidenti Si Cinpin, Braziliya prezidenti Lula da Silva və Cənubi Afrika prezidenti Siril Ramafosa da dəvət olunub. Serbiya prezidenti Aleksandr Vuçiçin iştirak edib-etməyəcəyi isə hələlik dəqiqləşməyib.
Ukrayna prezidenti Volodimir Zelenski isə bu gün bəyan edib ki, rusiyalı qonaqların təhlükəsizliyinə ev sahibi ölkə zəmanət verməlidir.
Rusiya mediası bildirir ki, əgər 9 Mayda hər hansı gözlənilməz hadisə baş verərsə, Moskva uzun fasilədən sonra Ukrayna rəhbərliyinin qərar qəbul etdiyi Bankova küçəsindəki obyektləri hədəfə ala bilər. Qeyd edək ki, son illərdə Moskva və Qərb arasında mövcud olan anlaşmaya əsasən, Rusiya bu mərkəzlərə zərbə endirməyib.
08:25 04.05.2025
Oxunuş sayı: 10178
