İran İsrailin Suriyaya hücumlarını qınadı: "Təcili tədbirlər görülməlidir"
İran İsrailin Suriyada həyata keçirdiyi hava hücumlarını kəskin şəkildə pisləyib və beynəlxalq ictimaiyyəti, bu hücumların qarşısını almaq üçün təcili və təsirli tədbirlər görməyə çağırıb.
Crossmedia.az xəbər verir ki, bu barədə İran Xarici İşlər Nazirliyinin sözçüsü İsmayıl Bəqayi yazılı açıqlama yayıb.
O bildirib ki, İsrailin əsas məqsədi müstəqil dövlət olan Suriyanın müdafiə, iqtisadi və infrastruktur imkanlarını sıradan çıxarmaqdır.
Bəqayi qeyd edib ki, İsrail Suriyadakı strateji obyektlərə, hərbi və mülki infrastruktura hücumlarını davam etdirir, ölkənin bəzi ərazilərini işğal altında saxlayır.
Onun sözlərinə görə, Suriyanın ərazi bütövlüyü, ləyaqəti və milli suverenliyi qorunmalı və təmin edilməlidir.
İran rəsmisi beynəlxalq ictimaiyyəti və region dövlətlərini bu hücumlara qarşı konkret və səmərəli addımlar atmağa çağıraraq əlavə edib:
"Suriyaya qarşı davam edən təcavüz beynəlxalq ictimaiyyətdən təcili reaksiya tələb edir. Bu baxımdan, İslam Əməkdaşlıq Təşkilatının mövcud mexanizmlərdən istifadə edərək BMT Təhlükəsizlik Şurasını İsrailin qanunsuz addımlarına qarşı hərəkətə keçməyə vadar etməsi zəruridir".
Qeyd edək ki, İsrail ordusu son saatlarda Suriyanın Dəməşq, Həma, Latakiya, Dəra və Kuneytra vilayətlərinə hava zərbələri endirib.
Həmçinin, dünən Dəməşqdə Prezident Sarayının yaxınlığı da hədəfə alınıb.
Aybəniz Səfərova
00:39 04.05.2025
Oxunuş sayı: 10214
