Ərdoğan: “Hicaba qarşı çıxanlar qətiyyətli cavabımızla üzləşəcəklər”
Türkiyə Prezidenti Rəcəb Tayyib Ərdoğan Şimali Kiprdə (ŞKTR) hicab əleyhinə keçirilən etirazlara münasibət bildirib.
Crossmedia.az Türkiyə mətbuatına istinadən xəbər verir ki, o, bu gün Şimali Kiprdə yerli sakinlərlə görüşündə çıxış edərək hökumətin məktəblərdə hicabın qadağan olunması təşəbbüsünə qarşı keçirilən etirazlara reaksiya verib.
“Əgər ŞKTR-də kimsə qızlarımızın hicab taxmaq hüququna toxunmağa cəhd edərsə, bilməlidir ki, bizim qətiyyətli cavabımızla qarşılaşacaq”,– deyə Ərdoğan bildirib. O, çıxışı zamanı Şimali Kipr prezidenti Ersin Tatarla birlikdə olub.
Artıq bir aydır ki, Şimali Kiprdə bəzi şəhər sakinləri məktəblərdə müsəlman qızların baş örtüyü taxmasına qadağa qoyulması tələbi ilə aksiyalar keçirirlər.
Şərh verən Şərqi Aralıq dənizi Universitetinin politoloqu Umut Bozkurt bildirib ki, əhalinin əksəriyyəti özünü müsəlman saysa da, əslində dini praktika geniş yayılmayıb: bir çoxları spirtli içki qəbul edir, daha dindar insanlar isə dini baxışlarını gizlətməyə meyllidir.
Bozkurt həmçinin qeyd edib ki, yerli türklər ilə Türkiyədən gəlmiş miqrantlar arasında mədəni fərqlər var. Sonuncular hazırda sayca yerli əhalidən çox ola bilər və daha dindar, mühafizəkar hesab olunurlar.
“Mən Türkiyəni sevirəm, lakin bizim mədəniyyətimiz fərqlidir”, – deyə yerli həmkarlar ittifaqının rəhbəri Ahmet Serdaroğlu fransız nəşrinə müsahibəsində bildirib.
Mədinə Cəlilova
21:56 03.05.2025
Oxunuş sayı: 8389
