Azərbaycan səfiri acarıstanlı nazirlə mədəni əməkdaşlığın genişləndirilməsini müzakirə edib
Azərbaycanın Gürcüstandakı səfiri Faiq Quliyev Gürcüstanın Acarıstan Muxtar Respublikasının mədəniyyət naziri Elisso Bolkvadze ilə görüşüb. Bu barədə regionun Mədəniyyət Nazirliyinin mətbuat xidməti bildirib. “Acarıstanın mədəniyyət naziri Elisso Bolkvadze Azərbaycan Respublikasının Gürcüstandakı səfiri, habelə Batumidəki baş konsul Fuad Əzizovu qəbul edib”, – qurumun sosial şəbəkə hesabında qeyd olunub. Görüşdə həmçinin nazir müavinləri – Lado Mqaloblişvili, Badri Nakaşidze və İrma Abuladzenin iştirak etdiyi vurğulanıb.
Tərəflər Azərbaycan – Gürcüstan münasibətləri, mədəni əməkdaşlığın genişləndirilməsi və birgə layihələrin gerçəkləşdirilməsi imkanları ətrafında fikir mübadiləsi aparıblar.
Xatırladaq ki, ötən ay Faiq Quliyev Gürcüstan Prezidenti Mixeil Kavelaşvili ilə strateji tərəfdaşlığı müzakirə etmişdi.
06:40 03.05.2025
Oxunuş sayı: 6894
