Türkiyə və Misir arasında 12 ildən sonra ilk birgə hərbi təlim: Ankarada xüsusi təyinatlılar bir araya gəldi
Türkiyə və Misirin xüsusi təyinatlı qüvvələri 12 illik fasilədən sonra Ankarada birgə hərbi təlimlər keçirib. Təlimlərlə bağlı məlumatı Türkiyənin Milli Müdafiə Nazirliyi yayıb.
Crossmedia.az xarici mediaya istinadən bildirir ki, keçirilən təlimlər çərçivəsində müxtəlif hərbi bacarıqlar üzərində praktiki məşqlər həyata keçirilib. Təlim proqramına şəhər mühitində döyüş aparılması, snayper hazırlığı, tibbi yardım üzrə hazırlıq, sərbəst düşmə ilə paraşütlə tullanma, eləcə də helikopterlə bağlı müxtəlif əməliyyatların yerinə yetirilməsi daxil olub. Bu əməliyyatlara hava-desant hücumları, iplə sürətli enmə texnikası və yaralıların təxliyəsi daxildir. Bundan əlavə, təlimlərdə xüsusi kəşfiyyat əməliyyatları və birbaşa hərbi müdaxilə fəaliyyətləri də yer alıb.
Qeyd edək ki, Türkiyə və Misir arasında diplomatik münasibətlər 2023-cü ilin iyul ayında bərpa edilib. Həmin vaxtdan etibarən Ankara və Qahirə bütün sahələrdə, o cümlədən hərbi əməkdaşlıq sahəsində əlaqələri genişləndirməyə başlayıb. 2024-cü ildə isə ölkə liderləri arasında qarşılıqlı səfərlər reallaşıb — Türkiyə Prezidenti Rəcəb Tayyib Ərdoğan Misirə, Misir Prezidenti Əbdülfəttah əs-Sisi isə Türkiyəyə rəsmi səfər edib.
Xatırladaq ki, Türkiyə və Misir arasında münasibətlər 2013-cü ildə Misirdə baş vermiş hərbi çevrilişdən sonra pozulmuşdu. Həmin çevriliş nəticəsində ölkənin demokratik yolla seçilmiş prezidenti Məhəmməd Mursi devrilmiş, bu isə Türkiyənin ciddi reaksiyasına səbəb olmuşdu. Nəticədə iki ölkə arasındakı hərbi əməkdaşlıq da dayandırılmışdı.
2025-ci ildə keçirilən bu hərbi təlimlər Türkiyə və Misir arasında münasibətlərin normallaşmasından sonra baş tutan ilk ikitərəfli hərbi təlimlərdir. Bundan öncə, 2024-cü ilin oktyabr ayında hər iki ölkə Səudiyyə Ərəbistanı ilə birlikdə Pakistanda keçirilən beynəlxalq hava təlimlərində iştirak etmişdi.
Fatimə Nəbiyeva
23:55 02.05.2025
Oxunuş sayı: 1163
