Ankara xəbərdarlıq etdi: PKK silahı yerə qoymasa, onları məhv edəcəyik!
Türkiyə diplomatik mənbələri Suriyadakı son vəziyyətlə bağlı açıqlama verərək, Ankara ilə Dəməşq arasında milli barışıq və bölgədə sabitliyin təmin edilməsi istiqamətində aparılan səyləri diqqətə çatdırıblar.
Crossmedia.az türk mətbuatına istinadən xəbər verir ki, mənbələrin sözlərinə görə, Türkiyə Suriyada rejimin dəyişməsindən sonrakı dövrdə region ölkələri ilə Suriya rəhbərliyi arasında qarşılıqlı anlaşma və əməkdaşlığın qurulması üçün intensiv diplomatik fəaliyyət göstərib.
Diplomatik mənbələr bildiriblər ki, bu proses ABŞ başda olmaqla bir çox beynəlxalq aktorların da iştirak etdiyi görüşlər çərçivəsində aparılıb.
Əsas məqsəd Suriyanın ərazi bütövlüyünün qorunması, milli birliyin təmin olunması, terrorçu ünsürlərin aradan qaldırılması və ölkənin sabitliyinin bərpa edilməsidir. Həmçinin Suriyanın bərpası və sanksiyaların ləğvi də bu məqsədlər sırasındadır.
PKK və onun Suriyadakı uzantılarına toxunan mənbələr, Ankara rəhbərliyinin terror təşkilatlarının silahı yerə qoyması və bölgədəki qeyri-sabitliyə son qoyması ilə bağlı açıq və qətiyyətli mövqeyini ifadə ediblər:
“PKK Suriyada fəaliyyətini davam etdirərsə, onların məhv edilməsi üçün lazım olan vasitələr Türkiyənin əlində var” – deyə vurğulanıb.
Türkiyə Suriyada terrorla mübarizədə prinsipial mövqeyini davam etdirəcəyini və milli təhlükəsizliyinə təhdid yaradan hər cür fəaliyyətin qarşısının alınacağını bir daha bəyan edib.
Aybəniz Səfərova
18:53 02.05.2025
Oxunuş sayı: 9958
