Tramp Harvardı Fələstinə dəstəyə görə cəzalandırır
ABŞ prezidenti Donald Tramp Fələstin tərəfdarı etirazlarla gündəmə gələn Harvard Universitetinə qarşı növbəti sərt bəyanatla çıxış edib.
Crossmedia.az xəbər verir ki, Tramp, Truth Social platformasında yayımladığı açıqlamada Harvard Universitetinin vergidən azad statusunun ləğv olunacağını bildirib: “Biz Harvardın vergidən azad olmasını aradan qaldıracağıq. Onlar buna layiqdir!” – deyə prezident vurğulayıb.
Hazırkı açıqlama, Tramp administrasiyası ilə Harvard Universiteti arasında uzun müddətdir davam edən qarşıdurmanın növbəti mərhələsi kimi qiymətləndirilir.
Administrasiya, Harvard kampusunda Fələstinə dəstək aksiyalarını və universitetin müxtəliflik, bərabərlik və inklüzivlik proqramlarını əsas gətirərək, federal maliyyənin dayandırılacağı ilə hədələyib.
ABŞ Daxili Gəlir Xidməti (IRS) artıq Harvard Universitetinin vergidən azad statusunun ləğvi imkanını nəzərdən keçirdiyini təsdiqləyib.
Eyni zamanda, Tramp administrasiyası universitetə ayrılan 8,7 milyard dollardan çox federal qrantların istifadəsi ilə bağlı araşdırma başladıb.
Qərara etiraz edən Harvard professorları məsələ ilə bağlı məhkəməyə müraciət ediblər.
Administrasiya həmçinin universitet üçün nəzərdə tutulmuş 2,2 milyard dollarlıq maliyyə və 60 milyon dollarlıq müqavilə vəsaitini dondurub.
Görünür, bu gərginlik ABŞ-da akademik müstəqillik, söz azadlığı və siyasi təzyiqlər ətrafında daha geniş müzakirələrə səbəb olacaq.
Aybəniz Səfərova
18:15 02.05.2025
Oxunuş sayı: 892
