Suriyada druz liderinə sui-qəsd və bələdiyyə sədərinin qətli
Suriyanın “Rical əl-Kəramə” druz fraksiyasının rəhbəri Lait əl-Balus sui-qəsd cəhdindən sağ çıxıb. Dəməşqlə münasibətləri olan Balusun həyatına sui-qəsd cəhdi ilə bağlı məlumatlar yayılıb.
Crossmedia.az xarici mediaya istinadən bildirir ki, hadisə yaxın günlərdə Əşrəfiyyə-Səhnaya şəhərinin bələdiyyə sədərinin qətlə yetirilməsindən dərhal sonra baş verib. Mərhum mer hökumət qüvvələrinin şəhərə daxil olmasını dəstəkləmişdi. Onun öldürülməsində druz şeyxi Hikmət əl-Hicrinin silahlı qruplaşmalarının əli olduğu ehtimal edilir. Əl-Hicri İsrailin Suriya ərazisindəki işğalını açıq şəkildə dəstəkləyir.
Druz şeyxi Hikmət əl-Hicri beynəlxalq ictimaiyyəti – xüsusilə İsraili – Suriyadakı druzları “soyqırımdan qorumaq” adı ilə birbaşa müdaxiləyə çağırıb. O, Suriya hökumət qüvvələrini “təkfirçi dəstələr” adlandıraraq onlara qarşı sərt ittihamlar səsləndirib.
Əl-Hicri həmçinin Dəməşqə sadiq olan digər druz liderlərini xəyanətdə ittiham edib və açıq şəkildə rejimə qarşı mövqe sərgiləyib. Onun çıxışları druz icması daxilində parçalanmanı dərinləşdirib.
Məlumatlara görə, Hikmət əl-Hicri İsraillə yaxın əlaqələr saxlayır və Suriya ərazisində, xüsusilə Suveyda vilayətində druzlar üçün muxtar bir regionun yaradılmasını tələb edir.
Fatimə Nəbiyeva
22:27 01.05.2025
Oxunuş sayı: 676
