Reuters: Əsəd rejiminin süqutu İranın iqtisadi xülyasını puça çıxardı
“Reuters” agentliyi İranın Dəməşqdəki səfirliyindən əldə etdiyi məxfi sənədlərə istinadən bildirib ki, Tehran Suriyanın vətəndaş müharibəsindən sonra yenidən qurulması üçün iddialı iqtisadi plan hazırlayıb.
Crossmedia.az “Reuters” istinadla xəbər verir ki, plana əsasən, İran Suriyanı öz təsiri altına almağı və ölkəni iqtisadi asılı vəziyyətə salmağı hədəfləyib.
33 səhifəlik rəsmi sənəddə Suriya “400 milyard dollarlıq fürsət” kimi qiymətləndirilib. Lakin 2024-cü ilin dekabrında prezident Bəşar Əsədin Rusiyaya qaçması və rejimin süqutu ilə bu planlar iflasa uğrayıb.
Daha sonra İranın Dəməşqdəki səfirliyi ələ keçirilib və orada yüzlərlə sənəd, müqavilələr, infrastruktur layihələri və rəsmi məktublar aşkar edilib. Bu sənədlər İranın Suriyada reallaşdırmaq istədiyi enerji, nəqliyyat və sənaye layihələrinə milyardlarla dollar sərmayə yatırdığını üzə çıxarıb.
Layihələr arasında Latakiyadakı elektrik stansiyası, Suriyanın şərqində neft hasilatı, eləcə də Fərat çayı üzərində inşa edilən, lakin ABŞ-ın hava hücumları nəticəsində dağıdılmış dəmir yolu körpüsü də yer alıb. Reuters yazır ki, İranın planları beynəlxalq sanksiyalar, korrupsiya və təhlükəsizlik problemləri səbəbindən də dalana dirənib.
Mədinə Cəlilova
22:19 01.05.2025
Oxunuş sayı: 7592
