Müəllimləri bıçaqlayan 14 yaşlı qız 15 il azadlıqdan məhrum edildi
İki müəllimi və bir şagirdi bıçaqlayan 14 yaşlı qız 15 il müddətinə azadlıqdan məhrum edilib. Hadisə zamanı “Sizi öldürəcəyəm” deyə qışqıran yeniyetmə, cəzasının ən azı yarısını həbsdə çəkəcək.
Crossmedia.az xarici mediaya istinadən bildirir ki, yeniyetmə qızın yaşı az olduğu üçün onun kimliyi açıqlanmır. Fevral ayında keçirilən ikinci məhkəmə prosesində o, adam öldürməyə cəhd ittihamı ilə təqsirli bilinib. Birinci məhkəmə prosesi isə müxtəlif səbəblərlə nəticəsiz qalmışdı.
Hadisə ötən ilin aprel ayında Böyük Britaniyada, daha dəqiq desək, Uelsin Karmartenşir bölgəsindəki Ysgol Dyffryn Aman məktəbində baş verib. Müəllimlər Fiona Elias, Liz Hopkin və bir şagird bıçaq xəsarətləri ilə xəstəxanaya yerləşdiriliblər.
Məhkəmə zamanı məlum olub ki, yeniyetmə məktəbə hər gün silah gətirirmiş və 24 aprel 2024-cü ildə atasına məxsus çoxfunksiyalı bıçaqla ilk olaraq müəllimə Fiona Eliasa hücum edib. Hakim Paul Thomas hökm oxuyarkən bildirib ki, qız bu hücumları diqqət çəkmək məqsədilə həyata keçirib və hadisədən sonra peşmanlıq əlaməti göstərməyib.
Fatimə Nəbiyeva
16:29 28.04.2025
Oxunuş sayı: 9168
