Səudiyyə Ərəbistanı sahillərində həyəcan: İkinci neft tankeri vuruldu
Səudiyyə Ərəbistanı sahillərində qısa müddət ərzində ikinci neft tankerinə hücum qeydə alınıb.
Crossmedia.az xəbər verir ki, bu barədə Böyük Britaniyanın Dəniz Ticarət Əməliyyatları İdarəsi (UKMTO) məlumat yayıb.
Bildirilib ki, sonuncu hadisə cümə günü Qrinviç vaxtı ilə saat 19:22-də Əl-Cübeyl şəhərindən təxminən 144 kilometr şimal-şərqdə baş verib.
Tankerin kapitanının məlumatına görə, kiçik qayıqdan gəmiyə qumbaraatanla atəş açılıb. Hücum nəticəsində tankerin sol arxa hissəsinə ziyan dəyib.
Hadisə zamanı ekipaj üzvlərindən xəsarət alan olmayıb. Gəmiyə dəymiş ziyanın miqyası və ətraf mühitə mümkün təsirlər barədə qiymətləndirmə aparılır.
Hazırda aidiyyəti qurumlar hadisəni araşdırır. Bölgədən keçən gəmilərə ehtiyatlı olmaq və şübhəli fəaliyyətlər barədə məlumat vermək tövsiyə edilib.
Qeyd edək ki, bundan əvvəl UKMTO Əl-Cübeyldən təxminən 126 kilometr şimal-şərqdə daha bir tankerin naməlum mərmi ilə vurulduğunu açıqlamışdı.
İlk hücum zamanı gəminin bütün ekipaj üzvləri təhlükəsiz şəkildə təxliyə edilib. Hadisənin ətraf mühitə mənfi təsiri qeydə alınmayıb.
13:07 17.10.2026
Oxunuş sayı: 49
