Hindistan Pakistanla sərhədi bağladı və diplomatik əlaqələri kəsdi
Hindistan Kəşmirdə baş verən terror aktına cavab olaraq Pakistanla sərhədi bağlayıb və ölkədəki bütün Pakistan vətəndaşlarını çıxarır. Eyni zamanda Hindistan, Pakistanla 1960-cı ildə imzalanmış Hind Suları müqaviləsini də dayandırıb.
Crossmedia.az Hindistan mətbuatına istinadən xəbər verir ki, sözügedən müqavilə Pakistanın narahatlığı fonunda imzalanmışdı. Belə ki, Hind çayının mənbəyi Hindistan ərazisində yerləşdiyindən, Hindistan potensial müharibə zamanı Pakistanda quraqlıq və aclıq yarada bilərdi.
Hindistan həmçinin Pakistanla diplomatik əlaqələri kəsib və İslamabaddakı Ali Komissiya Ofisindən bütün diplomatik heyətini geri çağırıb. Hər iki ölkənin diplomatik missiyalarının heyəti 30 nəfərə endirilib.
Bundan əlavə, Hindistan Pakistandakı hərbi attaşeni persona non grata elan edib və ona ölkəni bir həftə ərzində tərk etmək tapşırılıb.
Öz növbəsində, Pakistan ordusu Hindistandan gələn mümkün addımlara cavab vermək üçün tam döyüş hazırlığı vəziyyətinə gətirilib.
Mədinə Cəlilova
21:45 23.04.2025
Oxunuş sayı: 11059
