Donald Tramp Yaxın Şərqə səfərə hazırlaşır
ABŞ prezidenti Donald Tramp may ayında Yaxın Şərqə rəsmi səfər edəcək. Bu barədə Ağ Evin sözçüsü Kerolin Levit mətbuat konfransında məlumat verib.
Crossmedia.az ABŞ mətbuatına istinadən xəbər verir ki, Levitin sözlərinə görə, prezident Tramp mayın 13-dən 16-na qədər Səudiyyə Ərəbistanı, Qətər və Birləşmiş Ərəb Əmirliklərinə səfər edəcək. Səfərin məqsədi strateji tərəfdaşlarla münasibətləri möhkəmləndirmək, regional təhlükəsizlik məsələlərini müzakirə etmək və iqtisadi əməkdaşlıq imkanlarını genişləndirməkdir.
Səfər proqramına bir sıra yüksək səviyyəli görüşlər, o cümlədən Səudiyyə Ərəbistanı kralı Salman bin Əbdüləziz, Qətər əmiri Tamim bin Həməd Al Tani və BƏƏ prezidenti Məhəmməd bin Zayed Al Nahyan ilə danışıqlar daxildir. Görüşlərdə enerji təhlükəsizliyi, müdafiə sahəsində əməkdaşlıq və Yaxın Şərqdəki humanitar vəziyyətin yaxşılaşdırılması məsələlərinin əsas müzakirə mövzuları olacağı gözlənilir.
Ağ Evdən verilən açıqlamaya görə, Trampın səfəri ABŞ-nin regiondakı müttəfiqləri ilə əlaqələrinin gücləndirilməsi və Yaxın Şərqdə sabitliyin təmin olunmasına verdiyi önəmin göstəricisidir.
Xatırladaq ki, Donald Tramp prezidentliyi dövründə də Yaxın Şərqə bir neçə səfər etmiş və ABŞ-ın regiondakı strateji maraqlarını ön planda saxlamışdı.
Mədinə Cəlilova
20:06 23.04.2025
Oxunuş sayı: 8961
