Professor Kadıoğlu: “Fay xətlərini yox, zəlzələnin ciddiliyini müzakirə etməliyik”
İstanbulun Silivri sahillərində baş verən zəlzələdən sonra fəlakətlərin idarə edilməsi üzrə professor Dr. Mikdat Kadıoğlu bu hadisəni “xəbərdarlıq” adlandıraraq, cəmiyyətin zəlzələyə hazırlıqsız olduğunu bildirib.
Çərşənbə günü saat 12:50 radələrində İstanbul və ətraf əyalətlərdə iki zəlzələ baş verib. AFAD ilk zəlzələnin maqnitudasını 6,2, ardınca baş verən ikinci zəlzələnin gücünü isə 4,4 bal olaraq açıqlayıb.
Crossmedia.az xarici mediaya istinadən bildirir ki, ilk zəlzələnin episentri Silivridən 23 km dənizdə, 6,9 km dərinlikdə, ikinci zəlzələ isə Büyükçekmecedən 14,7 km dənizdə və 7 km dərinlikdə qeydə alınıb.
Kadıoğlu bildirib ki, artıq fay xətlərini müzakirə etməyin mənası yoxdur: “Zəlzələ bizə ‘Mən burdayam, hazırsınızmı?’ sualını verir. Amma biz hələ də kiçik kvadratmetr hesablamaları ilə məşğuluq. İnsanlar şəhər çevrilməyə maraqsız yanaşır. Dövlət dəstək verir, amma nəticə zəifdir. Zəlzələyə hazır olmaq əvəzinə sadəcə gözləyirik.”
Professor əlavə edib ki, İstanbulda baş verə biləcək böyük bir zəlzələdə azı 340 min bina ciddi şəkildə zədələnə bilər və bu da 34 milyon axtarış-xilasetmə əməliyyatı deməkdir: “Bu cür miqyaslı bir fəlakəti idarə etmək mümkün deyil.”
Professor Dr. Mehmet Özcan isə fay xətlərinin müzakirəsini “vaxt itkisi” adlandıraraq bildirib ki, əsas məsələ zəlzələnin fəlakət kimi deyil, idarə olunmalı bir reallıq kimi dərk edilməsidir. Kadıoğlu da bu fikrə dəstək verərək vurğulayıb: “Biz fəlakətin səbəbləri ilə deyil, nəticələri ilə məşğul olmalıyıq. Amma daim texniki səhvlərdə ilişib qalırıq və bu da bizi fəlakətə hazırlıqsız buraxır.”
AFAD və İstanbul valiliyi zəlzələdən sonra əhalini qəzalı binalara daxil olmamaq barədə xəbərdar edib. Eyni bölgədə 4,9 və 4,2 bal gücündə daha iki zəlzələ baş verib və təkanların davam edəcəyi gözlənilir.
Zəhra Ağayeva
18:46 23.04.2025
Oxunuş sayı: 10737
