Ərdoğandan İstanbul zəlzələləri ilə bağlı ilk açıqlama
Türkiyə Prezidenti Rəcəb Tayyib Ərdoğan İstanbulda baş verən zəlzələlərlə bağlı açıqlama verib. O, "Keçmiş olsun. Gedişatı yaxından izləyirik", – deyə bildirib.
Crossmedia.az xarici mediaya istinadən bildirir ki, Marmara dənizində baş verən 3.9 və 6.2 bal gücündə zəlzələlərdən sonra Ərdoğan Daxili İşlər naziri Ali Yerlikaya, Ətraf Mühit, Şəhərsalma və İqlim Dəyişikliyi naziri Murat Kuram, eləcə də Səhiyyə naziri Kemal Memişoğlu ilə əlaqə saxlayaraq məlumat alıb.
Prezident eyni zamanda İstanbul valisi Davut Gül və Fövqəladə Hallar Agentliyinin (AFAD) rəhbəri Ali Hamza Pehlivanla da danışaraq vəziyyətlə bağlı operativ məlumat alıb və aidiyyəti qurumlara təlimatlar verib.
Türkiyə Böyük Millət Məclisinin sədri Numan Kurtulmuş da açıqlamasında “İstanbulda gözlənilən zəlzələ qapıdadır. Bütün qurumlar və vətəndaşlar hazır olmalıdır,” – deyə xəbərdarlıq edib.
Türkiyə vitse-prezidenti Cevdet Yılmaz isə qeyd edib ki, hazırkı mərhələdə can itkisi ilə bağlı məlumat daxil olmayıb. O bildirib ki, rəsmi qurumların verdiyi açıqlamalara əsaslanmaq vacibdir və fərqli, təsdiqlənməmiş mənbələrə etibar edilməməlidir.
Əlaqədar olaraq, Prezident Administrasiyasının Kommunikasiya rəhbəri Fəxrəddin Altun da açıqlama verərək, prezidentin prosesi yaxından izlədiyini və bütün qurumların koordinasiyalı şəkildə işlədiyini bildirib. Altun həmçinin media qurumlarına məsuliyyətli davranmağa və dezinformasiyadan uzaq durmağa çağırıb.
Fatimə Nəbiyeva
15:43 23.04.2025
Oxunuş sayı: 8668
