Federal məhkəmə Tramp administrasiyasına “Amerikanın Səsi”ni ləğv etməyi qadağan etdi
ABŞ prezidenti Donald Trampın administrasiyası “Amerikanın Səsi”nin bütün əməkdaşlarını işə bərpa etməli olacaq.
Crossmedia.az xarici mediaya istinadən bildirir ki, federal hakim Tramp administrasiyasına “Amerikanın Səsi” və “Azad Asiya” radiosu da daxil olmaqla ABŞ tərəfindən dəstəklənən digər media qurumlarını ləğv etmək səylərini dayandırmaq barədə qərar verib.
ABŞ-ın dairə hakimi Royce Lamberth hökumətin “Amerikanın Səsi”ni İkinci Dünya müharibəsi dövründən bəri ilk dəfə qeyri-qanuni şəkildə bağlamağa cəhd etdiyini bəyan edib.
Hakimin qərarında göstərilib ki, ABŞ Qlobal Media Agentliyi (USAGM) mart ayında “Amerikanın Səsi”nin 1300 əməkdaşının əksəriyyətini inzibati məzuniyyətə göndərib, daha 500 işçinin müqaviləsinə isə ayın sonunda xitam verilib. Bu addım Prezident Trampın martın 14-də imzaladığı sərəncamdan sonra atılıb. Həmin sərəncam USAGM də daxil olmaqla bir sıra federal qurumların “qanunvericiliyə uyğun maksimum dərəcədə ləğv edilməsini” tələb edirdi. Ağ Ev “Amerikanın Səsi”ni “anti-Tramp” və “radikal” təbliğat aparmaqda ittiham edib.
Hakim Lamberth qərarında bildirib ki, administrasiya “işçiləri və podratçıları dərhal işə qaytarmalı, radio, televiziya və onlayn yayımları bərpa etməlidir”. Bu göstəriş USAGM tərəfindən idarə olunan “Azad Asiya” və “Yaxın Şərq Yayım Şəbəkələri”nə də şamil olunur.
Qərarda qeyd olunub ki, Tramp administrasiyası bir neçə federal qanunu, o cümlədən Beynəlxalq Yayım Aktı və Konqresin Təxsisatlar Aktlarını pozmuş ola bilər. Hakim yazıb ki, “burada müttəhimlərin hərəkətlərindən daha aydın özbaşınalıq və şıltaqlıq nümunəsi təsəvvür etmək çətindir”.
“Amerikanın Səsi”nin əməkdaşlarını təmsil edən vəkillər qərarı mətbuat azadlığının qələbəsi kimi qiymətləndiriblər. Müxbir Patsy Widakuswara isə bildirib ki, bu qərar “sadəcə kiçik bir addımdır”, çünki hökumət çox güman ki, qərardan şikayət edəcək.
Amerika Xarici Xidmətlər Assosiasiyasının prezidenti Tom Yazdgerdi qərarla bağlı bildirib: “Məhkəmə redaksiya müstəqilliyini dəstəkləməklə USAGM jurnalistlərinin etibarlılığını və onların xidmət etdiyi qlobal missiyanı qorudu”.
Zəhra Ağayeva
16:18 23.04.2025
Oxunuş sayı: 9112
