Ukrayna ilə bağlı Londonda planlaşdırılan nazirlər görüşü təxirə salınıb
Ukrayna münaqişəsinin həlli ilə bağlı Londonda keçirilməsi planlaşdırılan yüksək səviyyəli danışıqlar təxirə salınıb. Britaniya Xarici İşlər Nazirliyi bildirib ki, əvvəlcə nazirlər səviyyəsində nəzərdə tutulan görüş artıq ekspertlər səviyyəsində keçiriləcək.
Crossmedia.az xarici mediaya istinadən bildirir ki, Britaniya tərəfi bu dəyişikliyi rəsmi şəkildə təsdiqləyib və qeyd olunub ki, danışıqlar tamamilə ləğv edilmir, sadəcə format dəyişdirilir. Ekspertlər səviyyəsində aparılacaq görüşdə tərəflər texniki məsələləri müzakirə edəcək və gələcəkdə mümkün nazirlər görüşünə hazırlıq görəcəklər.
Daha əvvəl Sky News məlumat vermişdi ki, Britaniyanın xarici işlər naziri, eləcə də Fransa və Almaniya XİN rəhbərləri Ukrayna üzrə Londonda keçirilməsi planlaşdırılan danışıqlarda iştirakdan imtina ediblər. Onların bu qərarı diplomatik dairələrdə ciddi rezonansa səbəb olub.
Bəzi analitiklərin fikrincə, bu dəyişiklik Qərb ölkələri arasında Ukrayna məsələsində razılaşmaların hələ tam formalaşmaması ilə bağlı ola bilər. Nazirlik səviyyəsində razılaşdırılmamış məsələlərin həlli üçün ilkin mərhələdə ekspertlərin iştirakı vacib hesab olunur.
Hazırkı mərhələdə danışıqların məqsədi atəşkəs və sülh təşəbbüsləri ilə bağlı ümumi yanaşmaların formalaşdırılmasıdır. Ekspertlər səviyyəsində görüşlərin gələcəkdə daha geniş formatlı – nazirlər səviyyəsində müzakirələr üçün zəmin yaradacağı gözlənilir.
Fatimə Nəbiyeva
15:39 23.04.2025
Oxunuş sayı: 652
