Skorseze Papa Fransiskin itkisinə kədərləndiyini bildirib
Əfsanəvi rejissor Martin Skorseze Papa Fransiskin vəfatından sonra onunla bağlı xatirələrini bölüşüb və dərin hüzn yaşadığını bildirib. Skorseze deyib ki, 88 yaşında vəfat edən Papa Fransisklə bir neçə dəfə görüşmək imkanı onun üçün böyük şərəf olub.
Crossmedia.az xarici mediaya istinadən bildirir ki, rejissor, “O, qeyri-adi bir insan idi. Zəifliklərini etiraf edirdi, müdrik və xeyirxah idi, insanlığa sarsılmaz bağlılığı vardı,” – sözlərini Variety-ə müsahibəsində deyib. O, həmçinin Papa Fransiskin maariflənməyə davam etdiyini və bağışlamanı təbliğ etdiyini vurğulayıb.
Skorseze 2016-cı ildə “Səssizlik” filminin təqdimatı öncəsi, eləcə də 2023-cü ildə Papa ilə görüşüb. Rejissorun İsa haqqında yeni film layihəsi üzərində çalışdığı da qeyd olunub. Skorsezenin ideyasına görə, bu film müasir dövrdə Nyu-York küçələrində, 16 mm formatında və ağ-qara çəkiləcək. Layihə yapon yazıçısı Şusaku Endonun “İsanın həyatı” əsəri əsasında hazırlanır.
“Mənim üçün itki böyükdür,” – deyə Skorseze bildirib. “Onun varlığı və istiliyi üçün darıxacağam. Dünya üçün də böyük itki oldu, amma o, arxasında heç vaxt sönməyəcək bir işıq qoydu”.
Zəhra Ağayeva
16:08 23.04.2025
Oxunuş sayı: 9925
